Կին Դէմքեր. Քրիստինէ Սահակեան

Պատրաստեց՝ ՇՈՒՇԻԿ ՄԱՒԻՍԱԳԱԼԵԱՆ

Ա. Սպենդիարեանի անուան օփերայի եւ պալէի ազգային ակադեմական թատրոնի մեներգչուհի, հանրապետական եւ միջազգային մրցոյթներու դափնեկիր, Երեւանի Կոմիտասի անուան պետական երաժշտանոցի դասախօս Քրիստինէ Սահակեանը անհերքելի արժէք է. եկէք` աւելի մօտէն ծանօթանանք անոր, «Լէյտի Նիուզ» կայքէջի կողմէ հրապարակուած հարցազրոյցի մը միջոցով:

«ԼԷՅՏԻ ՆԻՈՒԶ».- Ե՞րբ եւ ինչպէ՞ս կատարեր էք ձեր առաջին քայլերը դէպի երաժշտական ասպարէզ:

ՔՐԻՍՏԻՆԷ ՍԱՀԱԿԵԱՆ.- 7-8 տարեկանիս յաճախած եմ երաժշտական դպրոց: Յաջողութիւններս այնքան լաւ էին, որ պարտադիր պէտք էր մասնակցէի ամավերջի համերգներուն: Դաշնամուրի ուսուցչուհիս կը պնդէր, որ դաշնակահարուհի դառնամ, ձայնամարզումի ուսուցչուհիս` երգչուհի, իսկ բեմադրութեան դասատուս` բեմադրիչ…

«Լ. Ն.».- Իսկ որո՞նք էին ձեր երազանքները այդ շրջանին:

Ք. Ս.- Երբ դեր կը խաղայի, կը սիրէի բեմը, բեմի վրայ ապրած զգացումներս: Բայց յատուկ երազանք մը չեմ ունեցած, ձգեր եմ, որ օրուան պահանջը ճշդէ գալիքը:

Երբ մանուկ էի, կը մտածէի, որ պէտք է բժշկուհի դառնամ, դպրոցական տարիներուս շատ կը սիրէի քիմիագիտութիւնն ու կենսաբանութիւնը: Բայց այնպէս պատահեցաւ, որ երգարուեստը ընտրեմ:

«Լ. Ն.».- Կա՞ն հաճոյքներ, որոնցմէ դուք ձեզ կը զրկէք յանուն երգեցողութեան:

Ք. Ա.- Այո՛, անշուշտ: Կան եղանակային պտուղներ, որոնք ձայնալարերուն վրայ բացասական ազդեցութիւն կը գործեն, օրինակ` ելակը, թութը: Դասատուս խորհուրդ կու տար հրաժարիլ անոնցմէ, տրուած ըլլալով, որ այս պտուղները ունին փոքր աղուամազիկներ, որոնք «կը նստին» ձայնալարերուն վրայ եւ կը ծանրացնեն ձայնը ու կը դժուարացնեն երգելը:

«Լ. Ն.».- Ձեզի համար ի՞նչ է երջանկութիւնը:

Ք. Ս.- Երջանկութիւնը պահի մը զգացողութիւնն է: Այն պահը, որ քեզի մեծ լիցքեր կը բերէ, ատրենալին կը հաղորդէ, եւ դուն թեթեւութիւն կը զգաս: Օրինակ` երջանիկ ես երեխայի ծնունդով, յաջող ելոյթի յաջող աւարտով, երբ կը լսես հանդիսատեսներուն ծափահարութիւնները եւ գոհունակութեան խօսքերը: Երջանկութիւնը իրավիճակ է, բայց անընդհատ երջանիկ ըլլալը անհնար է:

«Լ. Ն.».- Ի՞նչ կը կարծէք, ընտանիքին մէջ տղամարդն ու կինը կրնա՞ն հաւասար իրաւունքներ ունենալ:

Ք. Ս.- Ես կը կարծեմ, որ ընտանիքին մէջ իւրաքանչիւրը ունի իր տեղն ու դերը: Երբեք կինը չի կրնար կատարել այն գործերը, ստանձնել այն պարտականութիւնները, զորս տղամարդը կը կատարէ, եւ` հակառակը: Ցանկալի է, որ կինը զգայ` իր կողքին տղամարդ կայ, որուն վրայ կրնայ յոյս դնել, յենիլ, եւ շատ մը հարցերու պարագային քեզի օգնական է, եւ անշուշտ, որուն խօսքը պէտք է դեր ունենայ ընտանիքին մէջ, եւ դուն առաջնորդուիս անով:

«Լ. Ն.».- Ի՞նչ բանէ շատ կը վախնաք:

Ք. Ս.- Հարազատներու կորուստէն եւ պատահական աղէտներէն:

«Լ. Ն.».- Ձեր կեանքի ամենամեծ նուէրը ո՞րն է:

Ք. Ս.- Բնականաբար` երեխաներուս ծնունդը, որ շատ մեծ նուէր կը համարեմ: Իւրաքանչիւր կին կ՛երազէ երեխայ ունենալ եւ մայր դառնալ:

«Լ. Ն.».- Ձեր խաղացած դերերէն ո՞րն է ամենասիրելին ձեզի համար:

Ք. Ս.- Խաղացած դերերէս ոչ մէկը կ՛ուզեմ առանձնացնել, որովհետեւ բոլորն ալ հաւասարապէս կը սիրեմ: Երբ դեր կը ստանձնեմ, արդէն սիրով կը կատարեմ անիկա: Թէ՛ Փառանձեմը կը սիրեմ, թէ՛ «Այտա»-ի Ամներիսը, թէ՛ «Թրուպատուր»-ի Ազուչեան եւ թէ՛ Ալմաստը:

Ցաւօք, մեր օփերային թատրոնի երգացանկը այսօր սահմանափակ է, եւ շատ դերեր կան, որ կը փափաքէի կատարել, սակայն առիթը չկայ:

«Լ. Ն.».- Հայաստանէն դուրս ո՞ր երկիրը ձեզ ամենաջերմ կերպով ընդունած է:

Ք. Ս.- Իւրաքանչիւր երկիր տարբեր է, նոյնպէս ալ` հանդիսատեսը: Սակայն անկեղծօրէն ամենաջերմ եւ ամենախիստ հանդիսատեսը գերմանացիներն են: Անոնք երաժշտութիւնը իւրայատուկ կ՛ընկալեն:

«Լ. Ն.».- Ինչպէ՞ս կը յաղթահարէք ներկայացած արգելքները:

Ք. Ս.- Գիտէք` ես արգելք չեմ տեսներ: Կը տեսնեմ խնդիրը եւ կը գտնեմ անոր լուծումը: Պէտք է համբերատար ըլլալ եւ տրուած ժամանակահատուածը արդիւնաւէտ ձեւով օգտագործել: Եթէ պէտք է օրուան մէջ 5 ժամ տրամադրել, կը տրամադրես, իսկ եթէ 1 ժամ տրամադրելով կրնաս լուծումի յանգիլ, շա՛տ աւելի լաւ: Պէտք է դուն անձնապէս գտնես խնդիրին լուծումը:

«Լ. Ն.».- Եթէ ամէն բան սկիզբէն սկսելու հնարաւորութիւնը ըլլար, բան մը կը փափաքէի՞ք փոխել:

Ք. Ս.- Ըստ երեւոյթին ո՛չ:

Ձմրան Եղանակի Խմիչքներէն

Թէյը

Կանաչ, սեւ, ճերմակ թէ կարմիր թէյի բոլոր տեսակներն ալ այլազան յատկութիւններ ունին, բայց մանաւանդ` բուժիչ յատկութիւններ:

Ահաւասիկ 5 համոզիչ պատճառներ` թէյ խմելու համար:

1

Կ՛օգնէ, որ նիհար մնանք:

Թէյը կը պարունակէ քաթեշին եւ թեֆլաւին նիւթերը, որոնք ազդու ճարպ այրողներ են: Թէյի բոլոր տեսակներէն կանաչ թէյն է, որ ամէնէն ազդուն է: Ահա թէ ինչո՛ւ պէտք է օրական մէկ-երկու բաժակ թէյ խմել:

2

Թէյը հարուստ է անթիօքսիտաններով:

Ծանօթ է, որ անթիօքսիտանները օգտակար են սրտին, մորթին եւ երակներուն: Անոնք նաեւ կ՛օգնեն պայքարելու որոշ հիւանդութիւններու եւ ծերութեան դէմ:

Մասնագէտներու կարծիքով, թէյին կաթ կամ շաքար պէտք չէ աւելցնել անոր դրական ազդեցութիւնները չէզոքացնելու համար: Նախընտրելի է բաւարարուիլ քիչ մը մեղրով:

3

Թէյը կազդուրող է:

Շնորհիւ քաֆէյինին եւ թէինին` անիկա ազդու կազդուրիչ մըն է, սակայն` ոչ սուրճին չափ:

4

Կնճիռները կը կանխարգիլէ:

Ճերմակ թէյը կը կանխարգիլէ մորթին ծերացումը եւ կնճիռներու յայտնութիւնը:

5

Թէյը կը պաշտպանէ քաղցկեղէն:

Յատկապէս կանաչ թէյը ունի հակաքաղցկեղային յատկութիւններ` շնորհիւ քաթեշին կոչուած նիւթին:

Ինչպէ՞ս Խմել

Մասնագէտներ կը յանձնարարեն առաւօտեան բաժակ մը սեւ թէյ խմել` արթննալու համար: Օրուան ընթացքին կանաչ, իսկ երեկոյեան` առանց քաֆէիինի տեսակ մը:

Մեխակով Եւ Կասիայով Թէյ

Բաղադրիչներ

4 բաժակ ջուր
1 փայտիկ կասիա
4-5 հատիկ մեխակի գամ
1 ապուրի դգալ թէյ
Մեղր` ըստ ճաշակի
Նուշ կամ ընկոյզ` խոշոր կտրտուած

Պատրաստութիւն

Թէյամանին մէջ լեցնել ջուրը, աւելցնել մեխակն ու կասիան: Զօրաւոր կրակի վրայ եռացնել, ապա կրակը տկարացնել եւ 5 վայրկեան եւս եռացնել:

Կրակը մարել, աւելցնել թէյը, սպասել 3 վայրկեան: Խառնել, քամոցէ անցընել: Հրամցնելէ առաջ աւելցնել մեղրը եւ մանրուած նուշը կամ ընկոյզը:

Սէ. կենսանիւթ ստանալու համար կարելի է նաեւ աւեցնել նարինջի կամ կիտրոնի շերտեր:

Սննդագիտական-Առողջապահական

Ծիրանին 11 Զարմանահրաշ Յատկութիւնները

Ծիրանը կը մաքրէ մարսողական համակարգը:

Ճաշելէ առաջ մէկ-երկու ծիրան կերէք ձեր մարսողութիւնը խթանելու համար: Ծիրանին պարունակած ալքալիները կը չէզոքացնեն թթուները, իսկ իր լուծողական յատկութեան շնորհիւ` անիկա աղիքներէն կը մաքրէ պատերուն փակած անցանկալի մնացորդները:

Ծիրանը կը պայքարի սակաւարիւնութեան դէմ:

Այս համեղ պտուղը երկաթի հարուստ աղբիւր է, ինչ որ կ՛օգնէ պայքարելու սակաւարիւնութեան դէմ:

Ծիրանը լուծողական է:

Փորկապութեան պարագային, թարմ կամ չոր ծիրան կերէք, եւ շատ արագ կը լուծուի ձեր պնդութեան հարցը: Կարելի է չոր ծիրանը կտրտել, թրջել եւ հիւթը խմել:

Ծիրանը ջերմը կ՛իջեցնէ:

Չոր ծիրանը թրջեցէք գաղջ ջուրի մէջ, դգալ մը մեղր աւելցուցէք, լուծեցէք ու խմեցէք:

Ծիրանը մորթը առողջ կը պահէ:

Շնորհիւ իր պարունակած կենսանիւթերուն եւ հանքայիններուն ծիրանի յաճախակի օգտագործումը մորթը կը պահէ առողջ, ողորկ եւ փայլուն:

Ծիրանը կ՛օգնէ յղի կիներուն:

Թելադրելի է, որ յղի կիները եւ կաթ տուող մայրերը տուրմն ու քաղցրաւենիները փոխարինեն ծիրանով, քանի որ անիկա աւելի սննդարար է եւ առողջապահական: Սակայն պէտք չէ չարաշահել:

Ծիրանը կը կարգաւորէ սրտին աշխատանքը:

Դարձեալ շնորհիւ իր հարուստ բաղադրիչներուն` օրական քանի մը թարմ կամ չոր ծիրան ուտելը կը նպաստէ սրտանօթային համակարգի լաւ գործունէութեան:

Ծիրանը կը պահպանէ տեսողութիւնը:

Ա. կենսանիւթով հարուստ ծիրանը կը պահպանէ տեսողութիւնը եւ կը պաշտպանէ քաթարաքթէ եւ այլ հիւանդութիւններէ: Ա. կեսանիւթը ոչ միայն տեսողութեան համար ամէնէն անհրաժեշտ կենսանիւթերէն է, այլ նաեւ հզօր անթիօքսիտան է:

Ծիրանը կը կանոնաւորէ արեան գերճնշումը:

Ծիրանը կը պարունակէ 3 անգամ աւելի փոթասիում եւ շատ աւելի քիչ աղ, քան` պանանը եւ կ՛օգնէ արեան ճնշման կայունացման:

Ծիրանը կ՛ամրացնէ մկանային հիւսուածքները:

Այս զարմանահրաշ պտուղը յանձնարարելի է յատկապէս մարզիկներուն եւ մարզասրահ յաճախողներուն, քանի որ երկար մարզումներէ ետք, մկանային հիւսուածքներուն մէջ յառաջացուցած միքրօճաքերը սնուցման կարիք ունին:

Ծիրանը կ՛օգնէ արեան արագ լերդացման:

Ծիրանին մէջ պարունակուող ՔԱ. կենսանիւթը կ՛օգնէ բաց վնասուածքներու կամ առատ արիւնահոսութեան պարագային  արեան արագ լերդացման: Օրական 5-6  ծիրան բաւական է 4 միքրոկրամ ՔԱ. կենսանիւթ ստանալու համար:

Տօնական այս օրերուն բոլորիս սեղաններէն անպակաս է չոր ծիրանը. ինչո՞ւ չօգտուինք անոր բարիքներէն: Անով փոխարինենք տուրմը եւ, ինչո՞ւ չէ, պատրաստենք համեղ եղինձներ:

Նորաձեւութիւն

2015 Տարուան Գլխաւոր Գոյնը

«Փանթոն քալըր ինսթիթութ» հետազօտական հիմնարկը հրապարակած է 2015-ի պաշտօնական գոյնը` մարսալան:

Մարսալան Սիկիլիոյ մէջ շատ յայտնի սեղանի գինի է: Անոր մութ կարմիր երանգը ընտրուած է ոչ պատահական: Անիկա կը խորհրդանշէ վստահութիւն եւ կայունութիւն, ինչ որ համընդհանուր տնտեսական լարուածութեան պարագային այնքան կարեւոր է ամբողջ աշխարհին:

Մարսալա գոյնը պիտի որդեգրուի ոչ միայն հագուստներու, այլեւ աքսեսուարներու, շրթներկերու եւ տան յարդարանքի աքսեսուարներու (վարագոյր, սաւանեղէն, սեղանի սպաս եւ այլն…) պարագաներուն:

Խոհագիր

Պրոքոլիով Եւ Ընկոյզով Ապուր

Բաղադրութիւն 4 անձի համար

600 կրամ պրոքոլի
3 միջակ գետնախնձոր
1 պճեղ սխտոր
Ափ մը մանրուած ընկոյզ
1 ապուրի դգալ ձէթ
1 սուրճի դգալ մշկընկոյզ
Հեղուկ սեր (250 կ)
Աղ, սեւ պղպեղ (ըստ ճաշակի)

Պատրաստութիւն

Պրոքոլին լուալ եւ պզտիկ կտորներու բաժնել:

Գետնախնձորները լուալ, կեղուել եւ խորանարդաձեւ կտրտել:

Կաթսայի մը մէջ ձէթը տաքցնել եւ գետնախնձորն ու սխտորին պճեղը հետը դարձնել, մինչեւ որ ոսկեգոյն դառնան:

Աղել պրոքոլիի կտորները, քանի մը վայրկեան եւս ձէթին մէջ դարձնել եւ ապա բանջարեղէնները ծածկելու չափ տաք ջուր աւելցնել եւ սպասել, որ եռայ: Կրակին տակը թեթեւցնել եւ եփել, մինչեւ որ բանջարեղէնները փափկանան:

Կաթսան կրակին վրայէն հանել աւելցնել մանրուած ընկոյզը, մշկընկոյզն ու սեւ պղպեղը, ինչպէս նաեւ` հեղուկ սերը:

Խառնուրդը հարիչէ անցընել եւ կրկին կրակին վրայ փոխադրել ու 2-3 վայրկեան եփել:

Հրամցնել փոս ամաններու մէջ` երեսը ընկոյզով զարդարելով:

 ՀՈ՜ՎԵՐ

Դուք ո՞ր երկրէն կու գաք, հո՛վեր,
այսքան քնքուշ ու մեղմ այսքան.
ո՞ր լեռներէն կու գաք, հո՛վեր,
համբոյրի պէս քրոջական:
Այնքան մեղմ էք, հեռուի հովեր,
կարծես շունչն էք քնած մանկան:

Մեր լեռներէն, հեռուի հովեր,
համբո՛յր տարէք ձեր լեռներուն,
վարդերու բոյր տարէք, հովեր,
մեր դաշտերէն` ձեր դաշտերուն:
Բայց թէ մէկ օր, հեռուի հովեր,
հողմեր բերէք մեր լեռներուն`
մեր ամպերը, մեր սարերէն`
շա՛նթ կը բերեն ձեր լեռներուն:

Շա՛նթ կը բերեն մեր լեռներէն,
մա՛հ կը սփռեն ձեր դաշտերուն,
ձեր դաշտերուն, ձեր լեռներուն,
ձեր աշխարհին, ձեր արեւին…

Մեր լեռներէն, հեռուի հովեր,
համբո՛յր տարէք ձեր լեռներուն.
համբոյր տարէք,
գարուն տարէք,
արե՜ւ տարէք աշխարհներուն:

ՅՈՎՀԱՆՆԷՍ ՇԻՐԱԶ