Փորձ-Հարցարան. Արդեօք Հոգեկան Անդորր Ունի՞ք

Պատրաստեց՝ ՇՈՒՇԻԿ ՄԱՒԻՍԱԳԱԼԵԱՆ

Որքանո՞վ խաղաղ եւ հաշտ էք ձեր անձին հետ: Իմանալու համար պատասխանեցէք ստորեւ տրուած 9 հարցումներուն, ապա կարդացէ՛ք արդիւնքը:

– 1 –

Դուք յաճա՞խ կը ժպտիք:

– Այո
– Ոչ

– 2 –

Դուք շա՞տ կը վիրաւորուիք ուրիշի խօսքէն:

– Այո
– Ոչ

– 3 –

Դուք ձեզ կը հաւնի՞ք:

– Այո
– Ոչ

– 4 –

Կ՛ակնկալէ՞ք, որ մարդիկ միշտ հաւանութիւն տան ձեր արարքներուն:

– Այո
– Ոչ

– 5 –

Զուարթախո՞հ մարդ էք:

– Այո
– Ոչ

– 6 –

Լաւատե՞ս մարդ էք:

– Այո
– Ոչ

– 7 –

Բարեկամներով շրջապատուա՞ծ մարդ էք:

– Այո
– Ոչ

– 8 –

Ձեր կարծիքով, ընկճուածութիւնը թուլութեան նշա՞ն է:

– Այո
– Ոչ

 – 9 –

Դուք առհասարակ հանգիստ կը քնանա՞ք:

– Այո
– Ոչ

Ստորեւ տրուած ցուցատախտակին հիմամբ հաշուեցէ՛ք ձեր միաւորները, ապա կարդացէ՛ք արդիւնքը:

ԱՐԴԻՒՆՔ

Եթէ 0 – 6 միաւոր հաւաքեցիք, դուք դատողութիւն ունեցող, շրջահայեաց մարդ էք եւ կը ձգտիք ամէն գնով պահպանել ձեր հոգեւոր խաղաղութիւնը: Այս յատկութիւնները ձեզ կը պաշտպանեն ընկճախտէ, սակայն ձեր շրջապատէն շատեր ձեզ կը համարեն «զգացումներէ զուրկ մարդ»:

***

Եթէ 6 – 12 միաւոր հաւաքեցիք, դուք հաւասարակշռուած, յաճախ վճռական, սակայն ոչ ճկուն անձ էք: Այս յատկութիւնները կ՛օգնեն, որ դուք պահպանէք ձեր հոգեկան հաւասարակշռութիւնը:

***

12-էն աւելի միաւոր հաւաքելու պարագային, դուք ամէն ինչի շատ զգացական կը մօտենաք: Անվստահութիւն` սեփական ուժերու նկատմամբ, ինչպէս նաեւ սեփական կեանքէն բաւարարուած չըլլալու վիճակը ձեզ կը զրկեն հոգեկան անդորրութենէ: Ժամանակ է, որ վերատեսութեան ենթարկէք ձեր կենսակերպը, անոր նկատմամբ ձեր վերաբերմունքը եւ համակերպիք այն մտքին հետ, որ կատարեալ մարդիկ չկան…

Նորաձեւութիւն

Յառաջիկայ Գարուն-Ամառ
Նորաձեւութիւնը

Նորաձեւութեան տուները արդէն իսկ ցուցադրած են 2016-ի գարուն-ամառ նորաձեւութեան իրենց հաւաքածոները:

Ահաւասիկ` խօսուն նկարներ, որոնք բացատրութեան չեն կարօտիր:

Ա.- Լաքոսթ, Ռալֆ Լորէն եւ Մարք Ճեքոպս կեդրոնացած են կարմիր, կապոյտ եւ ճերմակ գոյներուն վրայ:

Բ.- Միու Միու, Լուի Վուիթրոն եւ Լաւէն ներշնչուած են պալէի տարազներէն` «tutu»-ներէն:

Գ.- Քալվըն Քլէյն, Սեն Լորան եւ Պըրպըրի ներշնչուած են գիշերանոցներէն… սաթէն եւ բարակ պրըթելով երկար հագուստներ շատ պիտի տեսնենք յառաջիկայ զոյգ եղանակներուն:

Դ.- Մարք Ճեքոպս, Մաքս Մարա եւ Լաքոսթ կը վերակենդանացնեն ամերիկեան դրօշի գոյները, բայց նաեւ` աստղերը:

Առողջապահական

Գլխացաւ

Գլխացաւի որոշ տեսակներ կարելի է դարմանել առանց ցաւազրկիչ դեղահատերու: Ահաւասիկ` 4 մթերք, որոնք կ՛օգնեն գլխացաւը կանխարգիլելու եւ դարմանելու:

1.- Անանաս
Անանասը մեղմ բժշկութեան մէջ կ՛օգտագործուի շնչառական հիւանդութիւններու բուժման եւ մարսողութեան բարելաւման պարագաներուն: Շնորհիւ այլազան կենսանիւթերուն, հանքայիններուն եւ պրոմելինին, որ բորբոքումներն ու ցաւը մեղմացնելու յատկութիւնը ունի, անանասը յանձնարարելի է բոլոր անոնց, որոնք գլխացաւէ կը տառապին:

2.- Ձմերուկ
Գլխացաւը յաճախ կը յառաջանայ մարմնի ջրազրկման պատճառով: Ձմերուկը հարուստ է ոչ միայն ջուրով, այլ նաեւ` մակնեզիոմով:

3.- Վարունգ
Ինչպէս ձմերուկը, վարունգը եւս մեծ քանակութեամբ ջուր կը պարունակէ: Հետեւաբար յաճախակի վարունգ ուտելով կարելի է հեռու մնալ գլխացաւէն:

4.- Պանան
Մակնեզիոմով եւ փոթասիոմով պանանը նոյնպէս յանձնարարելի է գլխացաւէ տառապող անձերուն:

Բերանի Տհաճ Հոտ

Բերանի տհաճ հոտը ունի զանազան պատճառներ` ուտելիքներ, փտած ակռաներ, առողջական հարցեր: Ահաւասիկ դիւրին եւ արագ միջոցներ` բերանի տհաճ հոտը արագ եւ ժամանակաւոր չէզոքացնելու համար:

– Խնձոր մը ուտել խածնելով:
– Ազատքեղ, անանուխ կամ սուրճի հատիկ մը ծամել:
– Մեխակի գամ ծամել:
– Գինձի հատիկներ ծամել:
– Ակռաները յաճախ խոզանակել:

Արեան Գերճնշում

Ահաւասիկ 5 կանոն արեան գերճնշումը կանխելու եւ անոր զարգացումը ուշացնելու համար:

1.- Ճիշդ սնանիլ, չափաւոր ուտել, նուազեցնել աղի, ճարպի եւ շաքարի օգտագործումը:
2.- Հրաժարիլ ծխախոտէն:
3.- Մարզանք ընել:
4.- Խուսափիլ ընկճախտէն:
5.- Պարբերաբար ենթարկուիլ բժշկական քննութեան:

Անբաւարար Ջուր Խմելու
Նշաններ

Ահաւասիկ` 11 մտահոգիչ ազդանշաններ, որոնք ցոյց կու տան, թէ դուք բաւարար ջուր չէք խմեր, եւ ձեր մարմինը կը զրկէք կենսականօրէն անհրաժեշտ հեղուկէն:

1.- Բերանի չորութեան զգացում, 2.- Մորթի չորացում, 3.- Չափէն աւելի ծարաւի զգացում, 4.- Աչքերու չորութեան զգացում, 5.- Յօդացաւ, 6.- Մկանային զանգուածի նուազում, 7.- Հիւանդութեան երկար տեւողութիւն, 8.- Քնկոտութիւն եւ յոգնածութիւն, 9.- Անօթութեան զգացում, 10.- Մարսողական հարցեր, 11. Վաղաժամ ծերութեան նշաններ:

Խոհագիր

Ստեպղիով Եւ Գինձով Ապուր

Բաղադրութիւն 4 անձի համար

– 400 կրամ ստեպղին
– 30 սանթիլիթր քրենպըրիի հիւթ (շուկան շիշով կը վաճառուի)
– Կէս կապոց գինձ
– Աղ, սեւ համեմ
– Քրենպըրիի հատիկներ` զարդարանքի համար

Պատրաստութիւն

Ստեպղինները լուալ, կեղուել եւ կլոր կտրտել:

Կաթսայի մը մէջ աղի ջուր լեցնել եւ մանրուած ստեպղինները մէջը խաշել 15 վայրկեան:

Խաշած ստեպղինը քամոցէ անցընել եւ ձգել որ պաղի:

Հարիչին մէջ դնել խաշած ստեպղինը, աւելցնել քրենպըրիի հիւթը եւ հարել միատարր խիւս մը ստանալու համար:

Ստացուած խիւսը 5 վայրկեան տաքցնել, փոխադրել փոս ամանի մը մէջ, աւելցնել մանրուած գինձը եւ երեսը զարդարել քրենպըրիի հատիկներով:

Շաբթուան Բանաստեղծութիւնը

Ուզում Եմ Սասունում Ապրել

Ոչ մի յաղթանակ հանգիստ չի տրւում,
Հեշտ չէ պահպանել երկիր ու հաւատ,
Ոչ մի ազգութիւն նորից չի յառնում,
Հեշտ չէ պահպանել ազգս ցաւառատ:

Ոչ մի քաջ, հերոս նորից չի ծնուի,
Հեշտ չէ հերոսներ ծնել անընդհատ,
Ոչ մի նահատակ երբեք չի ների,
Որ իրենց ուխտը թողնենք անաւարտ:

Ոչ մի հայրենիք մերը չի դառնայ,
Մերը չի դառնայ օտարի լեզուն,
Ոչ մի ուրիշ մայր մեզ մայր չի դառնայ,
Ամուր պահեցէ՛ք ձեր մօրն ու լեզուն:

Ոչ մի ուրիշ լեռ Մասիս չի դառնայ,
Հեշտ չէ մի ողջ դար նախատինք կրել,
Ոչ մի շէն քաղաք Վան, Կարս չի դառնայ.
Հայե՛ր, ուզում եմ Սասունում ապրել…

ՄԱՐԻՆԷ ՅԱԿՈԲԵԱՆ