Պատրաստեց՝ ՇՈՒՇԻԿ ՄԱՒԻՍԱԳԱԼԵԱՆ
Ամանորի ամէնէն աւելի սպասուած պահերէն մէկը նուէրներու փոխանակման պահն է: Բաւարար չէ գեղեցիկ նուէր ընտրելը. անիկա պէտք է այնպիսի գեղեցիկ ու գրաւիչ տեսք ունենայ, որ ստացողին մօտ զայն բանալու ցանկութիւն յառաջանայ: Չմոռնանք, որ գեղեցիկ ու ճաշակով ծրարումը կը կրկնապատկէ նուէրին արժէքը:
Ստորեւ ամանորեայ նուէրները ծրարելու 5 ստեղծագործ տարբերակներ:
Գեղեցկագիտական
Դիմակ` Կնճիռներու Դէմ
Քաքաոյով եւ կանաչ թէյով պատրաստուած այս դիմակին արդիւնքը նկատելի կ՛ըլլայ շատ արագ: Երկու-երեք շաբաթէն դէմքին մորթը կը դառնայ ձիգ եւ մանր կնճիռները շուտով կ՛անհետանան: Այս դիմակը փորձելէ առաջ վստահ եղէք, որ բաղադրիչներէն մէկուն հանդէպ գերզգայնութիւն չունիք:
Բաղադրիչներ
– 1 ապուրի դգալ աղացած կանաչ թէյ
– Կէս ապուրի դգալ փոշի քաքաօ
– 1 թէյի դգալ մեղր
– Տաք ջուր
Պատրաստութիւն
Մաքուր ամանի մը մէջ խառնեցէք կանաչ թէյն ու քաքաօն, քիչ-քիչ աւելցուցէք տաք ջուրը, թանձր խիւս մը ստանալու համար: Սպասեցէք, որ քիչ մը պաղի, ապա աւելցուցէք մեղրը:
Ստացուած թանձրուկը քսեցէք ձեր դէմքին, սպասեցէք 20 վայրկեան, ապա ցօղուեցէք գաղջ ջուրով:
Թելադրելի է առաջին 2 շաբաթը դիմակը գործածել շաբաթը 3 անգամ, այնուհետեւ` շաբաթը մէկ անգամ:
Առողջապահական
Հազը Արագ Բուժելու
Բնական Միջոց
Տարուան այս եղանակին հազը շատ տարածուած է, սակայն կայ բնական միջոց մը, որ կ՛օգնէ մեզի ձերբազատիլ անկէ:
Բաղադրութիւն
– 150 մլ ջուր
– 6 հատ դափնիի տերեւ
– 1 կիտրոն
– 6 ապուրի դգալ շէկ շաքար
Պատրաստութիւն
Ջուրը լեցնել մաքուր կաթսայի մը մէջ, աւելցնել դափնիի տերեւները եւ եփել փակ կափարիչով 6 – 10 վայրկեան:
Տերեւները ջուրէն հանել, իսկ ջուրը լեցնել ապակեայ մաքուր շիշի մը մէջ: Աւելցնել շաքարը եւ կիտրոնի հիւթը: Լաւ ցնցել, որպէսզի շաքարը լուծուի:
Այս օշարակէն կարելի է խմել օրական 5 – 6 դգալ, գաղջ վիճակի մէջ: Կարելի է այս օշարակին կողքին օրական քանի մը անգամ շերտ մը կիտրոն ծամել:
Յոռետեսութիւնը Կ՛ազդէ
Մեր Առողջութեան Վրայ
Ֆինլանտացի գիտնականներ երկարատեւ ուսումնասիրութիւններէ ետք հասած են այն եզրակացութեան, որ յոռետեսութիւնը բացասաբար կ՛ազդէ մեր առողջութեան վիճակին վրայ:
Հետազօտութիւնները ցոյց տուած են, որ յոռետես մարդիկ աւելի յաճախ կը տառապին սրտանօթային հիւանդութիւններէ, քան` լաւատեսները: Այսպէս, առաջիններուն մօտ գլխու կամ սիրտի կաթուածէ մահանալու հաւանականութիւնը զգալիօրէն աւելի բարձր է:
Գիտափորձին մասնակցած են 52-76 տարեկան մօտ 2 հազար կամաւորներ, որոնց առողջական վիճակին հետեւած են 11 տարի շարունակ: Այդ ընթացքին գիտնականները հաւաքած են կամաւորներու կեանքին մասին տուեալներ` անոնց զգացական եւ առողջական վիճակին վերաբերող:
11 տարի ետք կամաւորներէն 121-ը մահացած են սրտանօթային հիւանդութիւններով: Անոնց ճնշող մեծամասնութիւնը յոռետես մարդիկ էին, հետեւաբար փորձագէտները յանգած են այն եզրակացութեան, որ յոռետեսութեան բարձր մակարդակը մեծ ազդեցութիւն ունի մեր առողջութեան վրայ:
Հետաքրքրական Հաստատումներ
Ժպիտի Մասին
Ժպիտը վարակիչ է: Ժպտեցէք դիմացի մարդուն, եւ ան կը ժպտի ձեզի:
***
Աւելի դիւրին է ժպտիլ, քան` լուրջ դիմագիծ ունենալ, քանի որ լրջանալու պարագային աւելի շատ դէմքի մկաններ ստիպուած էք աշխատցնել:
***
Կիները աւելի յաճախ կը ժպտին, քան` տղամարդիկ:
***
Սան Ֆրանսիսքոյի մէջ գտնուող գիտաշխատանոցի մը աշխատակիցները յաջողած են տարբերել ժպիտի 19 տեսակ:
***
Թայլանտի մէջ ժպիտին պէտք է պատասխանել ժպիտով: Այս պատճառով ալ Թայլանտը կը համարուի ժպիտի երկիր:
***
Առաջին անգամ Ժպիտի միջազգային օրը նշուած է 1999 թուականին:
***
Մասնագէտներու կարծիքով, յաճախ ժպտող մարդոց մօտ աւելի շատ կնճիռներ կը յառաջանան:
– Ժպտող մարդիկ աւելի հաճելի են, յուսալի եւ նուազ յարձակողական:
***
Ժպիտը ամենապարզ միջոցն է արտաքին տեսքը գեղեցկացնելու:
***
Յաճախ ժպտեցէք, չէ՞ որ ժպիտը կեանքը կ՛երկարէ…
Մեր Առօրեան Դիւրացնող
7 Հնարք
– 1-
Եթէ որոշած էք կրկնեփուկ պատրաստել եւ տունը հաւկիթ չկայ, կրնաք զայն փոխարինել պանանով: Կէս պանանը համազօր է մէկ հաւկիթի:
– 2 –
Որպէսզի վազքի ժամանակ ձեր կողը չցաւի, արտաշնչեցէք ամէն անգամ, երբ ձախ ոտքը գետին կը դիպչի:
– 3 –
Որպէսզի բջիջային երաժշտութիւնը աւելի բարձր հնչէ, զայն տեղաւորեցէք մետաղեայ ամանի մը մէջ:
– 4 –
Եթէ ձեր լեզուն այրած էք տաք կերակուրէն կամ թէյէն, շաքարը կ՛օգնէ մեղմացնելու ցաւը:
– 5 –
Մժեղի խայթոցին վրայ դրէք տաքցուած մետաղեայ դգալ մը եւ քորը անմիջապէս կ՛անցնի:
– 6 –
Երբ զգաք, որ ուր որ է պիտի փռնգտաք, ձեր լեզուն սեղմեցէք քիմքին եւ ամէն ինչ շուտով կ՛անցնի:
– 7 –
Եթէ գլխացաւ ունիք, ձեր ճակատը շփեցէք կիսուած կիտրոնով մը:
Խոհագիր
Ղափամա
Ղափաման Արեւելեան Հայաստանի աւանդական կերակուր է, որ առաւելաբար կը պատրաստուէր Ս. Ծնունդի, Ս. Զատիկի եւ հարսանիքներու առիթով:
Բաղադրութիւն
– Խոշոր դդում մը (1,5 քիլօ)
– 150 կրամ բրինձ
– 150 կրամ կարագ
– 50 կրամ չոր սալոր
– 50 կրամ չոր ծիրան
– 50 կրամ չամիչ
– 50 կրամ մեղր
– 100 կրամ ընկոյզ
– Աղ եւ քիչ մը փոշի կասիա
Պատրաստութիւն
Դդումը լուալ, գլխուն բաժինը կլոր կտրել այնպէս, որ որպէս կափարիչ օգտագործուի:
Մաքրել դդումին մէջը, հանել կուտերն ու թելերը, լուալ եւ հակառակ դարձնել, որպէսզի ջուրը սուզուի:
Կաթսային մէջ 3 բաժակ ջուր եռացնել, աւելցնել բրինձը եւ թեթեւ կրակի վրայ եփել 15 վայրկեան (անիկա պէտք է կիսաեփ ըլլայ): Աւելցած ջուրը քամել:
Առանձին ամանի մէջ բրինձը խառնել կտրտուած չիրերուն հետ, աւելցնել կարագը, աղը, կասիան, մեղրն ու ընկոյզը: Խառնուրդը լեցնել դդումին մէջ, աւելցնել 1/4 բաժակ եռացած ջուր, փակել կտրած կափարիչով:
Դդումը փոխադրել նախապէս տաքցուած փուռին մէջ, 200 ջերմաստիճանով եփել 1,5 ժամ, մինչեւ որ դդումը փափկանայ:
Հրամցնելու պահուն դդումը երկայնքին շերտերու վերածել:
Շաբթուան Բանաստեղծութիւնը
Խօսք Նոր Տարուն
Ես ի՞նչ եմ ուզում որ բերես դու ինձ…
Ոչինչ… Ախ, միայն ոչինչ չտանես,
Միայն չխլես,
ՈՒ քո անզիջում հողմերին չտաս
Այս սէրը-
Իր մէջ առաջին սիրոյ
Կապոյտն ունեցող
ՈՒ լոյսն ունեցող
Այս սէրը,
Նրա հրաշքն անքնին
Եւ անգամ նրա տառապանքն անքուն.
Չտանես,
Քո խենթ հողմերին չտաս,
ՈՒ ես ամէն ինչ կ՛ունենամ կեանքում.ՎԱՀԱԳՆ ԴԱՒԹԵԱՆ