Պատրաստեց՝ ՇՈՒՇԻԿ ՄԱՒԻՍԱԳԱԼԵԱՆ
Ճուլիա Ռոպըրց, Սալմա Հայեք, Սինտի Քրաուֆորտ, Հալի Պերի 50-ը թեւակոխած, բայց տակաւին իրենց հմայքը պահող կիներ են…
Այն տեսքը, որ ունի կինը 20 տարեկանին, բնութեան պարգեւն է, իսկ 40 տարեկանին` անոր ջանքերու պտուղն է: Ասիկա կը նշանակէ, որ հետեւիլ կազմուածքին եւ արտաքինին, զբաղիլ սիրած աշխատանքով, հոպի ունենալ, նոր բան մը ուսումնասիրել` անհրաժեշտ են ոչ միայն երիտասարդ տարիքին, այլ` ամբողջ կեանքի ընթացքին:
Ստորեւ կը ներկայացնենք ամբողջ աշխարհը իրենց գեղեցկութեամբ ապշեցնող 50-ը անց կիներու խորհուրդները, որոնք շատ աւելի թանկ են, քան` գեղեցկագիտական արտադրութիւնները:
– 1 –
Ուտելիքը` որպէս դաւանանք:
Մենք այն ենք, ինչ կ՛ուտենք: Բժիշկներու կարծիքով, սննդակարգը կ՛ազդէ մորթի որակին եւ տարիքի հետ տեղի ունեցող փոփոխութիւններուն վրայ: Քաթրին Տէօնէօվ, Ճէյն Ֆոնտա, Սոֆիա Լորէն իրենց մորթին փայլքն ու անթերի տեսքը կը վերագրեն իրենց ուտելիքներուն:
– 2 –
Հարցը հագուստի քանակին մէջ չէ, այլ` որակին:
Նոյնիսկ միջին եկամուտ ունեցող կինը կրնայ իրեն համար գնել որակաւոր հագուստ եւ աքսեսուարներ: Այս բոլորը ժամանակի ընթացքին կը դառնան տարեց կնոջ վայելուչ տեսքի գրաւականը:
– 3 –
Տարիքի հետ հասարակական կեանքը չի մեռնիր:
50-ը անց կիներուն մէկ կարեւոր տոկոսը ժամանակը կ՛անցընէ հեռատեսիլին դիմաց, մինչդեռ երբ զաւակները արդէն մեծցած են եւ տեւական ուշադրութեան կարիք չունին, կարելի է աւելի յաճախ թատրոն, մշակութային ձեռնարկներու, ճաշարան եւ, ինչո՞ւ չէ, փապ երթալ եւ բարեկամներու հետ աւելի կապի մէջ մնալ:
– 4 –
Բացայայտել նորը:
Ցանկալի է օրական նոր բան մը սորվիլ` կեանքին հանդէպ հետաքրքրութիւնը պահպանելով: Ասիկա եւս երիտասարդ կը պահէ կինը:
– 5 –
Մարզանքին կարեւորութիւնը:
Մարզանքը անհրաժեշտ է ոչ միայն գեղեցիկ կազմուածք, այլեւ ամուր մկաններ եւ առողջ միտք ունենալու համար: Ճէյն Ֆոնտան լաւագոյն օրինակն է:
– 6 –
Դիմայարդարումը:
Տարիքի հետ դիմայարդարումը պէտք է նուազի, յատկապէս այն, ինչ կը վերաբերի շպարին: Շեշտուած շպարը կը ծերացնէ արդէն իսկ կնճռոտ դէմքը: Դիմայարդարումը նախատեսուած է միայն մորթին թերութիւնները սրբագրելու համար:
– 7 –
Հիւմըրի զգացումը:
Կեանքին պէտք է դրականօրէն նայիլ եւ չփախցնել լուսաւոր պահերը: Իսկ կատակելն ու խնդալը կ՛երիտասարդացնեն եւ կ՛երկարաձգեն կեանքը…
Գնչուական Բաղադրատոմսեր`
Փարթամ Մազեր Ունենալու Համար
Գնչուհիները ծանօթ են իրենց փարթամ, գեղեցիկ ու առողջ մազերով: Կը ներկայացնենք 4 բաղադրատոմսեր, որոնց օգտագործման շնորհիւ հնարաւոր է ունենալ նոյնքան փարթամ ու գեղեցիկ մազեր:
1.- Մեղրով Քսուկ
Առէք հաւկիթ մը, անոր վրայ աւելցուցէք 1 թէյի դգալ մեղր եւ 2 թէյի դգալ ձէթ, խառնեցէք միատարր նիւթ մը ստանալու համար: Այս խառնուրդը տարածեցէք ձեր մազերուն վրայ եւ մատներուն ծայրով մարձեցէք գլխուն մորթը: 15 վայրկեան սպասեցէք, ապա լուացէք ձեր մազերը:
2.- Քոնեաքով Քսուկ
Առէք հաւկիթ մը, աւելցուցէք 2 ապուրի դգալ քոնեաք, խառնեցէք միատարր նիւթ մը ստանալու համար: Ստացուած խառնուրդը տարածեցէք ձեր մազերուն վրայ, մարձեցէք զանոնք, ապա մազերը լուացէք տաք ջուրով:
3.- Սոխով Քսուկ
Առէք միջին չափի սոխ մը, կեղուեցէք եւ շատ մանր մանրեցէք, աւելցուցէք կէս բաժակ ռոմ խմիչք: 24 ժամ սպասեցէք, ապա քամոցէ անցուցէք եւ այդ հեղուկով մարձեցէք ձեր մազերն ու գլխուն մորթը: Այս գործողութիւնը կատարեցէք 2 օրը անգամ մը:
4.- Հաւկիթով Քսուկ
Երկու հաւկիթի դեղնուցները զարնել, 1 բաժակ տաք ջուր աւելցնել եւ ստացուած հեղուկը քսել մազերուն: 1 ժամ սպասել, ապա մազերը լուալ առանց օճառի:
Նորաձեւութիւն
2017-ի Գարնան Պարտադիր Կտորը`
Անթեւ Երկար Բաճկոնը
Գրեթէ բոլոր անուանի ձեւագէտները իրենց գարնանային հաւաքածոներուն մէջ յատուկ կարեւորութիւն տուած են անթեւ, երկար բաճկոններուն: Մասնագէտներու կարծիքով, անոնք կը ծածկեն կազմուածքի որոշ թերութիւններ եւ աւելի սլացիկ տեսք կու տան մարմնին: Ստորեւ քանի մը հետաքրքրական նմուշ:
Խոհագիր
Ոսպով Պահքի Ուտեստ
Բաղադրութիւն
– Ոսպ
– Ստեպղին
– Սխտոր
– Ազատքեղ, կանաչ սոխ, անանուխ
– Աղ, սեւ պղպեղ, կարմիր փոշի պղպեղ
– Բուսական իւղ
– Կսկուծ
Պատրաստութիւն
Ոսպը ամբողջ գիշեր մը թրջել պաղ ջուրի մէջ, քամոցէ անցընել եւ մսաղացով աղալ մէկ ստեպղինի, 2 պճեղ սխտորի եւ կանաչեղէններուն հետ: Աւելցնել աղ, սեւ եւ կարմիր պղպեղ եւ ձգել քառորդ ժամ, որպէսզի խառնուրդը կպչուն դառնայ:
Ափերուն մէջ կլոր-տափակ ձեւաւորել խառնուրդը, կսկուծի մէջ թաթխել եւ ապա տապկել բուսական ձէթի մէջ:
Թելադրելի է մատուցել աղցանի մը կողքին:
Շաբթուան Բանաստեղծութիւնը
Հերոսական ընկերներով միասին
Կայծակի պէս դու շանթեցիր թշնամուն,
Իտէալների վեհ դրօշը քո ձեռքին,
Քաջի մահով ընկար պատուի սուրբ դաշտում:Քո սիրելի հայրենիքում նորազատ,
Որ քեզ տուեց դիւցազնի կամք ու կորով,
Ամէն մի սիրտ մորմոքում է քեզ համար,
Եւ գլուխներն խոնարհում են յարգանքով:Քո ճակատը` յաղթանակով պսակուած,
Մեր պատմութեան մէջ քայլում ես դու փառքով.
Եւ ահա՛ մեր ճակատները խոնարհած
Գործիդ հանդէպ բարձրանում են պարծանքով:Մեր ցասումը, մեր վրէժը, ո՛վ հերոս,
Քո երկաթէ բազուկիդ մէջ դու տարար,
Եւ զարկեցիր նենգ թշնամուդ բարբարոս,
Ոսոխի դէմ դարձար վահան ու պատուար:Քե՛զ յաւերժ փառք… հանգչի՛ր խաղաղ ու անդորր.
Նոր հերոսներ կը կայծակեն քո հետքով.
Հայաստանը կը բողբոջի նորից նոր,
Կը զարդարէ քո շիրիմը վարդերով:ԱՒԵՏԻՔ ԻՍԱՀԱԿԵԱՆ