Պատրաստեց՝ ՇՈՒՇԻԿ ՄԱՒԻՍԱԳԱԳԼԵԱՆ
Յաճախ կը պատահի, որ երեխաները իրենց կոպիտ կամ անքաղաքավար ընթացքով նեղ կացութեան մատնեն իրենց ծնողները: Պէտք չէ զանոնք մեղադրել, եթէ փոքր տարիքէն անոնք չեն սորված կենցաղավարութեան հիմնական կանոնները:
Ստորեւ` վարքականոնի պարտադիր կէտեր` միշտ ի մտի ունենալով, որ երեխաներուն լաւագոյն օրինակը ծնողներն են:
. Երեխային սորվեցնել «խնդրեմ» ըսել, երբ ան որեւէ բան պիտի ուզէ:
. Երբ ան բան մը ստանայ, պէտք է «շնորհակալութիւն» յայտնէ:
. Երբ երեխան սխալի «ներողութիւն» պէտք է ըսէ:
. Ան պէտք է գիտնայ, որ մեծերուն խօսակցութեան միջամտելը կամ անոնց խօսակցութիւնը ընդհատելը սխալ է:
. Երբ երեխան ուրիշէն իր մը պիտի վերցնէ, անպայման պէտք է ստանայ տիրոջ հաւանութիւնը:
. Երեխան պէտք չէ բացասական բառեր, հայհոյանքներ օգտագործէ, մանաւանդ` ուրիշներու ներկայութեան:
. Բոլոր մարդիկ ի ծնէ հաւասար են, հետեւաբար երեխան պէտք չէ ծաղրէ ուրիշը` ֆիզիքական թերութիւններուն համար:
. Երբ երեխան սենեակ մը պիտի մտնէ, նախքան մտնելը անպայման դուռը պէտք է թակէ:
. Եթէ խաղի ատեն կամ այլուր սխալմամբ ուրիշին զարնուի, ան անմիջապէս ներողութիւն պէտք է խնդրէ:
. Երբ պիտի յօրանջէ ան ձեռքով բերանը պէտք է ծածկէ:
. Ընկերներու, ծանօթներու հանդիպելու պարագային ան անպայման պէտք է բարեւէ:
. Ճաշի սեղանին շուրջ ան պէտք է վարժուի դգալ, դանակ եւ պատառաքաղ գործածել:
. Լեցուն բերնով ան պէտք չէ խօսի:
Շարքը երկար է, սակայն այսքանն իսկ բաւարար է, որ երեխան դառնայ բարեկիրթ եւ օրինակելի:
Կ՛արժէ Մտածել…
Պահքը Նիհարնալու
Միջոց Չէ
Այս տարի Մեծ պահքը սկսաւ փետրուար 27-ին եւ պիտի երկարի մինչեւ ապրիլի 16-ը` Ս. Զատիկ:
Պահքը օգտակար է նաեւ բժշկական տեսակէտէ, քանի որ գարնանամուտը առանց ճարպային, կենդանական սնունդի անցընելը դրական ազդեցութիւն կ՛ունենայ մեր մարմնին վրայ: Սակայն սխալ է այն մտայնութիւնը, որ պահքը նիհարնալու միջոց է:
Պահքը չի սահմանափակուիր միայն կենդանական սնունդէ հրաժարումով. անիկա առաջին հերթին հոգեկան ու բարոյական ամէն տեսակի ախտերէ եւ գործերէ մաքրուիլն է, զղջումով եւ ապաշխարութեամբ աստուածահաճոյ եւ արաքինի կեանքի դառնալն է:
Պահքի շրջանին կարեւոր է պահպանել հոգեւորը, ինչպէս եզնիկ կողբացին կ՛ըսէ. «Մէկը կրնայ անասունի միս չուտել, բայց անընդհատ իր եղբօր միսը ծամել»:
Մեր Առօրեան Դիւրացնող Հնարք
Ինչպէ՞ս Կիտրոնը Երկար Ժամանակ
Թարմ Պահել
Որպէսզի կիտրոնը երկար ատեն թարմ պահուի, նախընտրելի է զայն սառնարանը պահել: Որպէս գլխաւոր կանոն` վնասուած կիտրոնը սառնարանը մի՛ պահէք, անմիջապէս սպառեցէք, մնացեալները չվնասելու համար:
Փորձառուներու կարծիքով, կիտրոններու պահպանման լաւագոյն տարբերակը զանոնք փականով օժտուած կերպընկալ տոպրակի մէջ պահելն է. այսպիսով անոնք 4 շաբաթ սառնարանին մէջ թարմ եւ առողջ կը մնան:
Դիւրին եւ նոյնքան ազդու տարբերակ մըն է իւրաքանչիւր կիտրոն ալիւմինիոմ թերթով փաթթել եւ սառնարանին բանջարեղէնի գզրոցին մէջ պահելը:
Կ՛արժէ փորձել…
Ննջարանին Օդը Մաքրող
Եւ Քունը Բարելաւող Բոյսեր
Անհանգիստ քուն, գիշերային մղջաւանջներ, անքնութիւն, աբնէա … ասոնց պատճառները բազմաթիւ են` սկսած ընկճախտէն մինչեւ նստակեաց կեանք, սենեակի օդի ապականում եւ այլն… Ամէն պարագայի գոյութիւն ունի քունը բարելաւելու պարզ եւ անվտանգ միջոց: Պարզապէս տեղադրեցէք այս 5 բոյսերէն մէկը ննջարանին մէջ եւ կը նկատէք, որ ձեր քունի որակը զգալիօրէն բարելաւուեր է:
Ալոէ Վերա
Այս սենեկային բոյսը մեծ քանակութեամբ թթուածին կ՛արտադրէ, այսպիսով մաքուր կը պահէ ննջարանին օդը եւ կը բարելաւէ քունի որակը: ՆԱՍԱ-ն Ալոէ Վերան ներառած է օդին որակը բարձրացնող լաւագոյն սենեկային բոյսերու ցանկին վրայ:
Նարդոս (Լաւանտ)
Հարիւրամեակներէ ի վեր մարդկութեան ծանօթ է այս բոյսին հանգստացնող յատկութիւնները: Հետազօտութիւնները ցոյց տուած են, որ անիկա կը դանդաղեցնէ քունին դանդաղ փուլը եւ կը կրճատէ արագ փուլը. այսպիսով մարմնին կ՛օգնէ աւելի դիւրին արթննալ` աւելի կարճ ժամանակահատուածի մը մէջ:
Յասմիկ
Յասմիկին բոյրը կը բարելաւէ քունին որակը եւ կ՛օգնէ պայքարելու տագնապի եւ ընկճախտի դէմ: Այս բոյսը օժտուած է հանգստացնող յատկութեաբ եւ կը նուազեցնէ ջղագրգիռ վիճակը:
Բաղեղ
Բաղեղը մագլցող բոյս է, եւ շատ դիւրին է զայն աճեցնել սենեակի մէջ: Անիկա զգալիօրէն կը բարելաւէ օդին որակը, քանի որ կը կլանէ թունաւոր նիւթերը եւ թթուածին կ՛արտադրէ: Բաղեղը 94 առ հարիւրով կը նուազեցնէ օդին մէջ բորբոք քանակը:
Սանսեվիերա
Սանսեվիերան կամ զոքանչի լեզուն շատ յարմար սենեկային բոյս է. անիկա կը կլանէ թունաւոր նիւթերթ եւ ածխաթթու կազը` միաժամանակ մեծ քանակութեամբ թթուածին արտադրելով: Սանսեվիերան հրաշալի ընտրութիւն է բոլոր անոնց համար, որոնք կ՛ուզեն ձերբազատիլ քունի հետ կապուած հարցերէ եւ բարելաւել ընդհանուր մթնոլորտը:
Բոյսը տան մէջ միշտ գեղեցիկ է եւ հաճելի, բայց եթէ ան նաեւ կը մաքրէ օդը եւ կը լուծէ անքնութեան հետ կապուած հարցերը, պատճառ մը աւելի, որ կառչինք անոր:
Խոհագիր
Ժիւլիէն
Բաղադրութիւն
– 500 կրամ սունկ (նախընտրաբար թարմ)
– 3 ապրուրի դգալ ձէթ
– 30 կրամ դեղին պանիր (կրիւյէր, էմանթալ, ֆոնտել…)
– Պեշամել թացան` 250 միլլիլիթր
Պատրաստութիւն
Սունկերը կտրատել եւ ձէթին մէջ տապկել: Քիչ մը մէկ կողմ ձգել զարդարանքի համար:
Սունկերուն վրայ աւելցնել պեշամել թացանին կէսը եւ խառնել:
Խառնուրդը լեցնել հողէ փոքրիկ ամաններու մէջ, աւելցնել մնացեալ թացանը, իւրաքանչիւրին երեսը կտրատել եւ շարել պանիրի կտորները եւ զարդարել մէկ կողմ դրուած տապկուած սունկով:
Ամանները փոխադրել 200 ջերմաստիճանով նախապէս տաքցուած փուռի մէջ եւ եփել 20-25 վայրկեան:
Շաբթուան Բանաստեղծութիւնը
Երկու Աւերակներ
1.
Հին օրերուն,
Երբ դեռ սիրտըս վարդի մը վէս փթթումն ունէր,
Ու երազը դեռ աչքերուս հոյլ-հոյլ քերթուած կը ծորէր,
Հին օրերուն,
Լիբանանի սոճիներուն կախարդանքը արիւնիս մէջ`
Ես կ՛երթայի Պաալպեքի աւերակները դիտելու:
Ի՜նչ մռայլ փառք էր, ի՜նչ հեթանոս շքեղանք,
Արեւելեան մայրամուտի կանաչ-բոսոր շողերուն տակ,
Փռուած անոնց կիսակործան սիւներն ի վար.
Ի՜նչ լուսեղեն, մեծ վայելուչ քերթուած էր այդ`
Կանաչ-բոսոր շողերուն տակ…
-Չկա՛յ, չկա՛յ,- կը խորհէի, հիացումի արցունքներով,
– Այս կործանած պալատներուն փառքն ունեցող
Չկա՛յ, չկա՛յ…
Ու, Գեղեցկին ես սիրահար ու միամիտ պատանի`
Մութ նախանձի մ՛անմեկնելի գալարումը կ՛ունենայի
Այդ քարերուն հանդէպ տրտում, ջարդուած…2.
Հին-հին օրերը անցան.
Սիրտս ոչ եւս վարդի մը վէս փթթումն ունի.
Ալ երազը աչքերուս մեջ հոյլ-հոյլ քերթուած չի ծորեր:
Եւ ալ չ՛երգեր, արիւնիս մեջ,
Կախարդ երգը Լիբանանի քնարերգակ սոճիներուն.
Հին-հին օրերը անցան…Հիմա, սակայն, շատ իրիկուն,
Երբ կը քալեմ այս գունաթափ երկնքին տակ,
Ու կը խորհիմ, այնպէս յանկարծ,
Պաալպեքի հին, կործանած պալատներուն`
Ալ չեմ ըսեր.
– Չկա՛յ, չկա՛յ անոնց մռայլ փառքն ունեցող.
Ալ չեմ ըսեր, ինչու որ կա՛յ…3.
Ահ, հոյակա՜պ քերթուածը իմ հոգիիս,
Իմ աւերակ, իմ քարուքանդ հոգիիս..ՄԱՏԹԷՈՍ ԶԱՐԻՖԵԱՆ