Պատրաստեց՝ ՇՈՒՇԻԿ ՄԱՒԻՍԱԳԱԼԵԱՆ
Առանց երկար կեդրոնանալու` արագ աչք մը նետեցէք նկարին եւ ըսէք, թէ ի՛նչ նկատեցիք առաջին հերթին: Ձեր պատասխանը շատ բան կը պատմէ ձեր մասին.
Եթէ առաջին հերթին երկու կոկորդիլոս նկատեցիք…
Դուք առաջնորդի յատկութիւններով օժտուած էք, կը փորձէք ամէն գնով հասնիլ ձեր նպատակին. դժուարութիւններն ու սխալները չեն կեցներ ձեր թափը: Դուք չէք վարանիր ձեզմէ հեռացնելու ոեւէ անձ կամ որեւէ բան, որ կրնայ խոչընդոտել ձեր ճանապարհը: Տեղին վճռական էք եւ դաժան:
***
Եթէ առաջին հերթին թռչուն նկատեցիք…
Դուք բարութեան հաւատացող մարդ էք: Կը հաւատաք, որ կեանքի մէջ կարելի է հասնիլ ամէն ինչի` առանց ուրիշներուն վնասելու, մինչդեռ ուրիշներ համոզուած են, որ դուք շատ միամիտ անձ էք: Այս պատճառով ալ դուք յաճախ կը տուժէք:
Եզրակացութիւն` մի՛ ըլլաք այնքան մը բարի, որ մարդիկ ձեզ կուլ տան, բայց մի՛ ըլլաք այնքան մը դաժան, որ ձեր վրայ թքեն:
Նորաձեւութիւն
Արամ Նիկոլեանի Խորհուրդները
Նիկոլեան նորաձեւութեան տան հիմնադիր տնօրէն, Ձեւագէտներու միջազգային միութեան անդամ Արամ Նիկոլեան սիրուած եւ գնահատուած ոճաբան է Հայաստանի մէջ: Ստորեւ կը ներկայացնենք ձեւագէտին խորհուրդներէն ու միտքերէն մէկ քանին:
2020-ին պէտք չէ կեդրոնանալ գոյնի եւ ձեւի վրայ: 2020-ի նորաձեւ պիտի ըլլայ անհատականութիւնը:
***
Խնամուած է այն կինը, որուն շպարը կամ հագուստը աչքի չեն զարներ, այլ կ՛ընդգծեն բնական առաւելութիւնները ու կը ծածկեն թերութիւնները:
***
Կարեւոր է, թէ կինը ինչպէ՛ս կը մտածէ ու կը խօսի, ինչպէ՛ս կը վարուի, ի՛նչ շարժուձեւերով:
***
Հիմա կ՛ապրինք այն ժամանակահատուածը, երբ նորաձեւութեան մէջ նոր բան ըսել` կամ ընելը գործնականօրէն անհնար դարձած են:
***
Ինծի համար նորաձեւ է նախ եւ առաջ անհատը, որ կրնայ տարբերիլ իր միջավայրով: Այլ խօսքով, նորաձեւութիւնը աւելի անհատականութիւն է, քան` ուղղութիւն:
Ահա թէ ի՛նչ կը պատմէ հայ ձեւագէտը իր մասնագիտութեան ընտրութեան գծով.
«Իրականում մեր տանը ոչ թէ պապա է, այլ հայրիկ: Եւ այդ հայրիկին համոզելը շատ աւելի բարդ էր, քանի որ ան շատ աւանդապաշտ է եւ հայրենասէր: Մենք նրան դեռ մանկուց «հայրիկ»-ով ենք դիմել մեր ընտանիքում գերիշխում են տնտեսագէտները` թէ՛ հայրս, թէ՛ մայրս մասնագիտութեամբ տնտեսագէտ են: Առաջին մասնագիտութեամբ ես եւս տնտեսագէտ եմ: Բայց հասկանալով, որ տնտեսագիտութիւնն իմը չի, ես ճիշդ որոշում եմ կայացրել: Եթէ անգամ ծնողներս հոգու խորքում դէմ են եղել, յամենայն դէպս չեն արտայայտուել: Նրանք ճիշդ որոշում են կայացրել իմ ապագայի ընտրութիւնը թողնելով ինձ վրայ»:
Հետաքրքրական
Հետաքրքրական Փաստեր
Գինիի Մասին
Գինին կը համարուի աշխարհի ամենահին եւ ամենասիրելի խմիչքներէն մէկը: Գինին յիշուած է Աստուածաշունչին, ինչպէս նաեւ յունական եւ հռոմէական առասպելաբանութեան մէջ: Մարդիկ գինեգործութեամբ զբաղած են շատ կանուխ ժամանակներէն:
Մեր օրերուն ալ գինին անփոխարինելի խմիչք է շատերուս համար, բայց արդեօք որքանո՞վ ծանօթ ենք այս աստուածային խմիչքին: Ստորեւ` հետաքրքրական փաստեր գինիին մասին:
Անցեալին տանտէրը գինին առաջին համտեսողը կ՛ըլլար, որպէսզի հիւրերը համոզուին, որ խմիչքը թունաւոր չէ: Եւ այստեղէն ալ յառաջացած է «խմել առողջութեան համար» արտայայտութիւնը:
***
Գինիի բաժակները շխկացնելու սովորութիւնը կու գայ շատ հինէն: Հին Հռոմի մէջ, երբ թագաւորներ կը հանդիպէին եւ ճաշի կը նստէին, այնքան զօրաւոր կը շխկացնէին գինիի բաժակները, որ բաժակներուն պարունակութիւնը կը խառնուէր իրարու եւ ատիկա ապացոյց էր, որ հրաւիրեալ թագաւորին բաժակի գինին թունաւորուած չէ:
Հին Յունաստանի մէջ հիւրընկալողը առաջինը կը խմէր գինին, որպէս նշան, որ դիմացինները թունաւորելու մտադիր չէ:
***
Գինիի համտեսումը խորքին մէջ բոյրի գնահատումն է: Համոզում կայ, որ կիներուն հոտառութիւնը աւելի զօրաւոր է, քան տղամարդոցը, այդ իսկ պատճառով փորձարկման համար աւելի յաճախ կիներուն կը դիմեն:
***
Կարմիր գինին կարմիր գոյն ունի, քանի որ խմորման ընթացքին ան խաղողի կեղեւին գոյնը կը ստանայ: Ճերմակ գինին խմորման գործընթացէ չ՛անցնիր:
***
Հին Հռոմի մէջ կիներուն արգիլուած էր գինի խմել: Եթէ կինը այդ օրէնքը խախտէր, ամուսինը զայն սպաննելու իրաւունք ունէր:
***
Գինիի համտեսման ընթացքին հարկաւոր է խմիչքը կարճ ժամանակ մը բերնին մէջ պահել: Որակաւոր գինիին համը աւելի երկար կը մնայ, մինչդեռ նուազ որակաւորինը շուտով կը չքանայ…
***
Բաժակ մը չոր կամ կարմիր գինին կը պարունակէ շուրջ 110 ջերմուժ: Որքան քաղցր է գինին, այնքան կը բարձրանայ անոր ջերմուժը:
***
Անցեալին գինին տարբեր ազգերու միջեւ յարաբերութիւններ կը հաստատէր եւ փոխանակման ապրանք էր: Օրինակ` յոյները խմիչքը կը փոխանակէին ոսկիի եւ արծաթի հետ, իսկ հռոմէացիները` ստրուկներու հետ:
***
Գինիին բաժակը բռնելու ճիշդ եւ սխալ տարբերակներ կան: Պէտք է բաժակին ոտքէն բռնել եւ ոչ` բաժակէն, այլապէս ափին ջերմութիւնը կը փոխանցուի գինիին:
***
Գինիին շիշը ուղղահայեաց պէտք չէ պահել, քանի որ խցանը կրնայ չորնալ եւ շիշին մէջ թթուածին կը մտնէ: Շիշը պէտք է պահել պառկած վիճակով:
***
Գինիին շիշը ո՛չ խոհանոցը եւ ոչ ալ սառնարանը կը պահուի, քանի որ շատ տաք կամ պաղ միջավայրը կրնան փճացնել զայն: Գինին պահելու իտէալական վայրը մութ եւ չոր մառանն է:
***
Որթատունկի այգիներու առաջին շարքերուն յաճախ վարդաստաններ կ՛ըլլան: Պատճա՞ռը, այգեգործները կը վախնան «օյտիոմ» կոչուած որթատունկերը հարուածող հիւանդութենէն, որ շատ կը տարածուի որթատունկերուն մէջ եւ մեծ աւեր կը գործէ: Վարդենիները վերոյիշեալ հիւանդութեան որթատունկերէն աւելի զգայուն ըլլալով` կրնան նախզգուշացնել այգեգործները հաւանական վտանգէ մը:
***
Գինիի տակառները կաղնիի փայտէ պատրաստուած կ՛ըլլան: Դարերու ընթացքին փորձուած են աքասիայի, շոճիի, բարտիի եւ այլ ծառերու փայտերը վերջաւորութեան կաղնին ինքզինք պարտադրած է, իր տոկունութեան եւ ճկունութեան պատճառով:
***
Որքան ալ տարօրինակ թուի, կան գինիին հանդէպ ֆոպիա ունեցող մարդիկ: Անոնք անբացատրելի եւ անհսկելի վախ կ՛ունենան այս խմիչքին նկատմամբ, իսկ այս ֆոպիան կը կոչուի օէնոֆոպի:
***
Ֆրանսացիները կ՛ըսեն` «Գինին ստեղծեցին հայերը, յոյները զայն վերածեցին գործի, իսկ ֆրանսացիները` արուեստի»: Շարլ Ազնաւուրի գնահատանքով «Հայկական գինիի առանձնայատկութիւնը այն է, որ կը զգաս այն, ինչ չես կրնար արտայայտել բառերով»:
***
2017-էն ի վեր Երեւանի Սարեան փողոցին վրայ կը կազմակերպուի «Երեւանի գինու օրեր» փառատօնը: Մայիսին կայացող այս փառատօնին հայաստանցի եւ արցախցի գինեգործները կը ներկայացնեն շուրջ 200 գինի տեսականի, իսկ ճաշարաններն ու սրճարանները կը պատրաստեն հայկական եւ միջազգային խոհանոցի յատուկ կերակրատեսակներ, այս բոլորին կ՛ընկերակցի բարձրորակ երաժշտութիւն:
«Երեւանի գինու օրեր»-ու նպատակն է խթանել զբօսաշրջութիւնը եւ ապահովել Հայաստանը որպէս գինիին հնագոյն օրրաններէն մէկը ըլլալու ճանաչողութիւնը:
Խոհագիր
Քիմիոնով Եւ Գինձով Սիսեռ
Բաղադրիչներ
Տուփ մը խաշած սիսեռ (կարելի է նաեւ տունը խաշել)
Տուփ մը ջարդուած լոլիկ (կարելի է տունը պատրաստել)
1 պզտիկ սոխ
Կէս սուրճի դգալ տաշուած կոճապղպեղ
2 պճեղ սխտոր
Կէս թէյի դգալ քիմիոն
Կէս թէյի դգալ փոշի գինձ (կարելի է թարմը գործածել)
15 սլ հնդկընկոյզի կաթ (պարտադիր չէ)
Ձէթ
Աղ, սեւ պղպեղ
Պատրաստութիւն
Սիսեռը ցօղուել եւ քամոցի մէջ փոխադրել:
Տապակին մէջ 2 ապուրի դգալ բուսական ձէթ տաքցնել, աւելցնել մանրուած սոխն ու քիմիոնը եւ թեթեւ կրակի վրայ ձգել` մերթ ընդ մերթ խառնելով: Ապա աւելցնել գինձը, ճզմուած սխտորը, կոճապղպեղը եւ 2 ապուրի դգալ ջուր: Խառնել եւ 5 վայրկեան եփել թեթեւ կրակի վրայ:
Ջարդուած լոլիկը աւելցնել խառնուրդին եւ շարունակել եփել 10 վայրկեան եւս: Վերջապէս աւելցնել հնդկընկոյզի կաթը, սիսեռը, աղն ու սեւ պղպեղը: Փակ կափարիչի տակ 5 վայրկեան եւս եփել եւ ահա՛ պատրաստ է:
Այս համեղ սննդարար եւ աժան կերակուրը կարելի է մատուցել պասմաթի կամ սովորական եղինձի կողքին:
Շաբթուան Բանաստեղծութիւնը
Աբովեան Փողոց
Մի պայծառ ճամբայ, մի զուարթ փողոց –
Շուրթին անունը մեր Աբովեանի,
Ձգւում է, պրւում – ծառով, ծիծաղով
Կանաչ սրտի մէջ մեր Երեւանի:
Բացուել են ուրիշ շքեղ փողոցներ,
Ու սերունդներ են եկել ու անցել,
Բայց նա ինչպէս հին ու առաջին սէր
Նորից ամէնից թանկն է մնացել:
Տխրում է հոգին – իր գիրկն ենք գնում,
Երբ ուրախ ենք մենք այնտեղ ենք կրկին
Երբ մտերիմ է սիրտը որոնում
Այնտեղ է գտնում իր որոնածին:
Ու երբ մտնում է մեր միտքը բարի
Հայոց հինաւուրց բախտի մռայլով
Մեզ սփոփում է նրա մայթերի
Կենդանութիւնը, աշխուժը խռով:
Ասես երակն է աշխարհի հայոց
Որ բաբախում է յաւերժ կենդանի
Մի պայծառ ճամբայ, մի զուարթ փողոց
Շուրթին – անունը մեր Աբովեանի…
ՍԻԼՎԱ ԿԱՊՈՒՏԻԿԵԱՆ