Մեր Զաւակները Եւ Մենք. Ի՞նչպէս Կանխարգիլել Տնային Արկածները

Պատրաստեց՝ ՇՈՒՇԻԿ ՄԱՒԻՍԱԳԱԼԵԱՆ

Վստահաբար գիտէք, որ երեխաներու մահուան պատճառներէն առաջինը տնային արկածներն են:

Տան զանազան սենեակները, բայց մանաւանդ խոհանոցը լեցուն են աննախատեսելի վտանգներով, որոնց պատճառով երեխաները կրնան մինչեւ մահուան դուռ երթալ: Հետեւաբար, ծնողները պէտք է աչալուրջ հսկեն իրենց երեխաներուն, զանոնք առանձին չձգեն եւ մանաւանդ անհրաժեշտ միջոցառումներ կանխատեսեն` երեխաներուն անվտանգութիւնը ապահովելու համար:

Ստորեւ կը ներկայացնենք տնային արկածներէն հիմնականները:

Խոհանոցը

Ինչպէս նշեցինք, տնային արկածներուն մեծ մասը կը պատահի խոհանոցին մէջ:

Երեխաները հեռու պէտք է պահել վառած փուռէն, կոթը դէպի դուրս երկարած սաներէն, ելեկրտրոնային գործիքներէն (հարիչ, մանրալիք եւ այլն…), լուցկիէն եւ հրահանէն. ասոնք բոլորն ալ այրուածքի հետ կապուած արկածներ կրնան պատճառել:

Մաքրութեան ծառայող քիմիական դեղերու շիշերը պէտք է զետեղել փակ պահարաններու մէջ եւ կամ բարձր դարաններու վրայ: Երբեք ջուրի շիշերու մէջ հեղուկ դեղ չփոխադրել, երեխան զայն ջուր կարծելով կրնայ խմել ու թունաւորիլ:

Խոհանոցի սեղանին վրայ պէտք չէ ձգել դանակ, մկրատ, խորովածի շամփուր եւ այլն… Ասոնք կրնան ծանրօրէն վիրաւորել երեխան եւ մինչեւ վիրահատութիւն տանիլ:

***

Լոգարանը

Երեխան կրնայ քանի մը վայրկեանի ընթացքին խեղդամահ ըլլալ, նոյնիսկ 20 սմ. ջուրի մէջ…

Երեխան երբեք առանձին պէտք չէ ձգել լոգարանին մէջ, թէկուզ` քանի մը վայրկեանով: Հեռախօսի զանգերուն պէտք չէ պատասխանել, թակուող դուռը բանալու պէտք չէ երթալ:

Լոգանքի արարողութեան անցնելէ առաջ ձեռքի տակ պէտք է ունենալ ամէն բան` օճառ, սպունգ, շամփուէն, ցամքոց եւ այլն…

Լոգարանին յատակը պէտք է ծածկել յատուկ գորգով, որպէսզի երեխան չսահի:

***

Նստասենեակ

Նստասենեակը պէտք չէ պահել թունաւոր համարուած բոյսի որոշ տեսակներ:

Նստասենեակի սեղանին վրայ պէտք չէ թափառին նախորդ գիշերուընէ մնացած պիստակեղէն, խմիչքի գաւաթներ ու շիշեր եւ այլն…

Նստասենեակը եւ ամէնուրեք պէտք չէ աթոռներ կամ սեղաններ գտնուին պատուհաններուն եւ պատշգամ տանող դռներուն մօտ: Երեխաները հետաքրքիր են, կրնան անոնց վրայ բարձրանալ դուրսը դիտելու ու իյնալ վար:

Եւ Տակաւին…

Երեխաներու հասողութենէն հեռու պէտք է պահել դեղահատերը, մանաւանդ եթէ անոնք գունաւոր են եւ շաքարի տպաւորութիւն կը ձգեն:

Տան մէջ պէտք չէ ձգել կերպընկալ տոպրակներ, երեխան տոպրակը գլուխը անցընելով շնչահեղձ կրնայ ըլլալ:

Ելեկտրական հոսանքին միացած արդուկը առանց հսկողութեան կարելի չէ ձգել. ելեկտրաթելը քաշելով արդուկը կրնայ շրջիլ եւ ծանրօրէն այրել մանուկը:

Տան մուտքի դուռը միշտ փակ պահել, իսկ ներքին դռներուն վրայէն վերցնել բոլոր բանալիները:

Ելեկտրաթելերու ամրակները պաշտպանուած եւ փակ պահել: Ելեկտրահարութեան արկածները կանխարգիլելու համար:

Ահա, թէ ինչպէս կարելի է նախատեսել ու կանխարգիլել տնային արկածները եւ պահպանել երեխաներուն անվտանգութիւնը:

Կին Դէմքեր

Եւա Գէորգեանի Յաջողութիւնները

Երիտասարդ դաշնակահարուհի, Հայաստանի ազգային ֆիլհարմոնիք նուագախումբի մենակատար Եւա Գէորգեանը «Կրան փրի» մրցանակին արժանացաւ Շիքակոյի միջազգային երաժշտական մրցումին:

Դաշնակահարուհին նաեւ յատուկ մրցանակ ստացաւ Ֆ. Շոփէնի ստեղծագործութեան լաւագոյն կատարման համար:

Այս անգամ առցանց ձեւաչափով կայացած մրցումի դատական կազմը իր հիացումը արտայայտած է տաղանդաւոր դաշնակահարուհիին կատարողական վարպետութեան գծով:

Նշենք, որ մրցումին մասնակցած են 22 երկիրներէ շուրջ 400 երաժիշտ: Ամէն տարի այս փառատօնը տեղի կ՛ունենար Մ. Նահանգներու Շիքակօ քաղաքին մէջ` համախմբելով աշխարհի ամէնէն տաղանդաւոր երաժիշտները եւ նպաստելով անոնց մասնագիտական զարգացման: Մրցումի նպատակներէն է նաեւ նպաստել մշակութային փոխանակութեան եւ յայտնաբերել երիտասարդ տաղանդները:

Եւա Գէորգեան ներկայիս կը պատրաստուի մասնակցելու Ֆ. Շոփէնի անուան դաշնակահարներու միջազգային մրցումին, որ աւանադաբար տեղի կ՛ունենայ Վարշաւայի մէջ:

«Քորոնա» համավարակին պատճառով մրցումը յետաձգուած է, եւ պիտի կայանայ 2021-ին:

Մեր Առօրեան Դիւրացնող Գիտելիքներ

 Խոհանոցային Գիտելիքներ

Երբեք ուշ չէ նոր բան մը սորվելու…

Այսօրուան էջով կը ներկայացնենք 10 օգտակար խոհանոցային հնարքներ, որոնք կ՛օգնեն թէ՛ ժամանակ խնայելու, եւ թէ աւելի արդիւնաւէտ դարձնելու ձեր աշխատանքը:

-1-

Մեզմէ իւրաքանչիւրը խաշած հաւկիթը կը սիրէ որոշ պնդութեամբ մը: Ստորեւ նկարը յստակօրէն կը ճշդէ, թէ հաւկիթը քանի վայրկեան պէտք է խաշել հիւթեղ, պինդ կամ շատ պինդ ստանալու համար:

-2-

Նախքան կարկանդակ կտրելը, եթէ դանակին շեղբը շատ տաք ջուրի տակ բռնէք, կարկանդակը շատ դիւրաւ կը շերտէք, եւ սերը դանակին շեղբին չի կպչիր:

-3-

Կտրուած կարկանդակը չի չորնար եւ երկար կը դիմանայ, եթէ անոր երկու ծայրամասերուն մէկական շերտ ֆրանսական «փէն տը մի» հաց զետեղէք:

-4-

Քանի մը օրուան փիցցաի առաջին օրուան թարմութիւնը վերադարձնելու համար անոր մակերեսին քիչ մը ջուր սրսկեցէք եւ ապա տաք փուռին մէջ տաքցուցէք:

-5-

Որպէսզի սոխը չփտի եւ չծլի, առէք կանացի մաքուր գուլպայ մը, սոխերը մէջը լեցուցէք այնպէս մը, որ հանգոյցներով իրարմէ բաժնէք, ապա զայն կախեցէք շուք եւ օդասուն տեղ մը:

-6-

Ալիւրը որդերէ եւ ճճիներէն պաշտպանելու համար, պարկին կամ շիշին մէջ քանի մը դափնիի տերեւ զետեղեցէք:

-7-

Որպէսզի գետնախնձորները չծլին եւ երկար դիմանան, անոնց միջեւ 1-2 խնձոր զետեղեցէք:

-8-

Սխտորը շատ երկար կը դիմանայ, եթէ զայն պատառաքաղով մը ծակծկուած թուղթէ տոպրակի մէջ դնէք եւ շուք տեղ մը զետեղէք:

-9-

Թոշնած խոտերը (անանուխ, ազատքեղ, գինձ…) մի՛ թափէք, զանոնք փուռի ափսէին վրայ տարածեցէք եւ եփեցէք մինչեւ չորնան: Պաղելէն ետք, զանոնք ձեռքով փշրեցէք եւ մաղէ անցուցէք, ապա ապակեայ մաքուր շիշի մէջ փոխադրեցէք:

-10-

Ազատքեղը աւելի երկար ժամանակ թարմ կը մնայ, եթէ զայն ալիւմիւնիոմ թուղթի մէջ փաթթենք ու սառնարանը պահենք:

Քանի Մը Տողով

«Պըրպըրի»-ի Պաշտպանիչ Դիմակները

Բրիտանական «Պըրպըրի» ապրանքանիշը թողարկած է հակավարկային պաշտպանիչ դիմակներու հաւաքածոն: Դիմակները պատրաստուած են վերամշակուած նիւթերէ եւ կը համապատասխանեն անձնական պաշտպանիչ միջոցառումներու պահանջներուն: Անոնք կը վաճառուին յատուկ պայուսակով, որ նոյնպէս պատրաստուած է հակամանրէային գործուածքէ:

«Պըրպըրի»-ի դիմակները կարելի է ձեռք բերել միայն առցանց, եւ իւրաքանչիւրը կ՛արժէ 198 տոլար:

Դիմակներու վաճառքէն գոյացած հասոյթին մէկ մասը պիտի փոխանցուի «Պըրպըրի»-ի «Քորոնա»վարակի հիմնադրամին:

«Լուսի» Պայուսակը

Այսօր A.W.A.K.E. ապրանքանիշը արդէն իսկ ինքզինք փաստած է նորաձեւութեան շրջանակներուն մէջ: Ձեւագէտ եւ ոճաբան Նաթալիա Ալաւերտեանը այս ապրանքանիշը հիմնած է 2012-ին` Բրիտանիա:

Ապրանքանիշին ամբողջական անուանումն է «All Worderful Adventures Kindle Enthusiasm»:

Ձուաձեւ «Լուսի» անունով պայուսակը այս տարի յայտնուած է նորաձեւութեան բոլոր շաբաթներուն ընթացքին: Այս փափուկ եւ գեղեցիկ պայուսակը կարելի է գտնել պէժ, ճերմակ, սեւ, պորտօ եւ այլ գոյներով եւ վստահաբար զայն կրողը աննշմար չ՛անցնիր…

Հայ Ձեւագէտը Լուսարձակի Տակ

Ռուսիոյ մէջ  յայտնի հայ ոճաբան Ալեքսանտր Սիրատեկեանը գրաւած է ռուսական «շուօ պիզնես»-ի աստղերուն ուշադրութիւնը` իր ստեղծած իւրայատուկ ու նորաձեւ կօշիկներով:

Նորաձեւութեան ոլորտի ամէնէն հեղինակաւոր ամսագիրներէն մէկը` «Vogue»-ը վերջերս անդրադարձած է Ալեքսանտր Սիրատեկեանի կօշիկներու հաւաքածոյին, ուր յատուկ ձեւով կը զատորոշուի բարձրակրունկ եւ ծոպով օժտուած տեսականին:

Խոհագիր

Ամառնային Յագեցնող Աղցան

Բաղադրիչներ

– 3-4 հատ միջակ չափի խաշած գետնախնձոր
– 3-4 հատ խաշած հաւկիթ
-250 կր. խաշած կանաչ լուբիա  (բարակ տեսակը)
– Քացախ
– Չոր լոլիկ` շատ փափաքի
– Տունը գտնուող որեւէ տեսակի խոտ, հազար եւ այլն…
– Ձիթապտուղի ձէթ
– Աղ, սեւ համեմ

Պատրաստութիւն

Խաշած գետնախնձորները կեղուել եւ խորանարդաձեւ կտրել: Կանաչ լուբիան քամոցի մէջ փոխադրել, որպէսզի ջուրը սուզուի:

Աղցանի յատուկ ամանի մը մէջ փոխադրել գետնախնձորը, մանրուած հազարը, կանաչ լուբիան եւ զգուշութեամբ խառնել:

Պզտիկ, փոս ամանի մը մէջ պատրաստել թացանը` ձէթով, քացախով, աղով եւ սեւ համեմով:

Թացանը թափել խառնուրդին վրայ, կրկին խառնել եւ զարդարել չոր լոլիկի եւ խաշած հաւկիթի շերտերով:

Շաբթուան Բանաստեղծութիւնը

Իմ բաժին տանջանքը կրեցի,
Իմ բաժին ցաւերին դիմացայ:
Ամէն տեղ ես իմ չափն իմացայ,
Պարտք տալով պարտքի մէջ խրուեցի:
Իմ բաժին կռիւը կռուեցի,
Իմ բաժին զրկանքը ես տարայ:
Տուեցի, տուածս ետ չառայ,
Ասացին ժլատ ես,-լռեցի:
Իմ բաժին աղունը փռեցի,
Իմ մէջքով ես տարայ ջրաղաց,
Բաշխեցի, ինձ ոչինչ չմնաց,
Հրճուանքից ես իմ մէջ փլուեցի:
Իմ լացով իմ այգին ջրեցի,
Իմ ջանքով իմ սարը բարձրացայ:
Պարզուելով, պարզուելով բարդացայ
Եւ նորից իմ միջից ծլեցի…
Իմ խելքով իմ երգը գրեցի,
Չուզեցի ոչ ոքից ոչ մի բան,
Իմ ոտքով բացեցի իմ ճամբան,
Իմ ձեռքով իմ բախտը կռեցի:

Հ. ՍԱՀԵԱՆ