Մեր Զաւակները Եւ Մենք . Ինչպէ՞ս Վարուիլ Զաւակներուն Հետ

Պատրաստեց՝ ՇՈՒՇԻԿ ՄԱՒԻՍԱԳԱԼԵԱՆ

Մարդ կը սորվի իր սխալներէն, սակայն հնարաւոր եղածին չափ պէտք է խուսափիլ անոնցմէ, իսկ խուսափելու համար պէտք է նախօրօք իմանալ, թէ ի՛նչ դժուարութիւններու եւ իրավիճակներու առջեւ կարելի է գտնուիլ:

Ահաւասիկ` քանի մը օգտակար թելադրանքներ:

-1-

Երբեք մեղաւոր մի՛ զգաք առաջնեկին հանդէպ, դուք երկու երեխայ ունիք, հաւասարապէս կը սիրէք զանոնք, երկուքին ալ արտայայտուեցէք այդ մասին, գրկեցէք, գուրգուրացէ՛ք, գորովալի խօսքեր ըսէք անոնց:

-2-

Նորածին երեխան խնամելու համար առաջնեկը ուրիշին խնամքին մի՛ յանձնէք, նոյնիսկ եթէ ան ձեր մայրը, քոյրը կամ մտերիմ ընկերուհին է:

-3-

Ձեր զաւակները իրարու հետ մի՛ համեմատէք:

Ամէն երեխայ անհատականութիւն է եւ տարբեր մօտեցում կը պահանջէ:

-4-

Յաճախ առաջնեկը կ՛ուզէ հոգ տանիլ եւ կամ գրկել նորածինը. մի՛ բարկանաք եւ մի՛ արգիլէք: Պարզապէս բացատրեցէք, թէ ինչպէ՛ս պէտք է վարուիլ նորածինին հետ: Առաջնեկը դարձուցէք ձեր վստահելի օգնականը:

-5-

Եղէք զուսպ եւ երեխաներէն մէկը մի՛ յանդիմանէք միւսին ներկայութեան:

-6-

Եթէ ձեր երեխաները տարբեր սեռերու կը պատկանին, անոնց միջեւ տարբերութիւն մի՛ դնէք: Երկուքը սիրեցէք հաւասարապէս եւ նոյնանման վերաբերում ցուցաբերեցէ՛ք:

-7-

Յաճախ ծնողները չեն կողմնորոշուիր` միջամտե՞լ երեխաներու վէճերուն… ասիկա կախեալ է տուեալ պահու իրավիճակէն: Միջամտելու պարագային, երկուքին ալ առիթ տուէք արտայայտուելու եւ համբերութեամբ բացատրեցէք իւրաքանչիւրին սխալը:

Գործնական Գիտելիքներ.  

Գէշ Հոտերը Չէզոքացնել
Առանց Քիմիականներու

Զանազան պատճառներով տան մէջ յաճախ անախորժ հոտեր ի յայտ կու գան. զանոնք չէզոքացնելու մեր առաջին հակազդեցութիւնը կ՛ըլլայ անուշ հոտ սփռող սփրէյ մը գործածել, քանի որ վայրկենական է եւ դիւրին: Կան սակայն նոյնքան դիւրին եւ մանաւանդ առողջապահական միջոցներ` խոհանոցէն, սառնարանէն, բաղնիքէն գէշ հոտերը վանելու:

-1-

Տան ապականած օդը մաքրելու համար տարբեր սենեակներու մէջ զետեղեցէք մէկական նարինջ, կիտրոն կամ կրիֆոն, որոնց վրայ մեխակի գամեր հաստատած ըլլաք: Անոնց շուրջ ժապաւէն մը կապելով` կրնաք նաեւ տեղէ մը կախել:

-2-

Սառնարանին մէջի կերակուրի հոտերը չէզոքացնելու համար օգտագործեցէք պիքարպոնաթ տը սուտը: Փոքրիկ, փոս ամանի մը մէջ քիչ մը լեցուցէք եւ զետեղեցէք սառնարանին մէկ անկիւնը:

-3-

Պահարաններուն մէջի ապականած օդն ու հոտը չէզոքացնելու համար թիւլ ծրարիկի մը մէջ կիտրոնի, նարինջի կտրտուած կեղեւներ զետեղեցէք եւ դրէք խոհանոցի կամ հագուստի պահարաններուն մէջ:

-4-

Մանրալիքը հականեխելու եւ գէշ հոտերը չէզոքացնելու համար դռնակը ամբողջ գիշեր մը բաց ձգեցէք, ապա 3 կաթիլ կիտրոնի հիւթ աւելցուցէք ջուրով լեցուն փոս ամանի մը մէջ եւ գործիքը աշխատցուցէք 3 վայրկեան:

-5-

Աղբամանին գէշ հոտերը չէզոքացնելու համար, նախքան կերպընկալ տոպրակը անցընելը, յատակին քիչ մը պիքարպոնաթ տը սուտ ցանեցէք եւ կամ քանի մը կաթիլ ճերմակ քացախ կաթեցուցէք:

-6-

Ծխախոտին անախորժ հոտը չէզոքացնելու համար դափնիի չոր տերեւներ այրեցէք: Գաւաթի մը մէջ թարմ  նարինջի հիւթ լեցուցէք, աւելցուցէք նարինջին կեղեւին տաշուքները եւ պտղունց մը կասիա: Գաւաթը զետեղեցէք սենեակին կեդրոնը:

-7-

Ձեր գորգը անուշ չի՞ հոտիր… անոր մակերեսին պիքարպոնաթ տը սուտ ցանեցէք, ամբողջ գիշեր մը ձգեցէք եւ յաջորդ օրը փոշեծծիչով մաքրեցէք:

-8-

Բաղնիքը գէ՞շ կը հոտի, անմիջապէս 1-2 լուցկի վառեցէք եւ հոտը վայրկենական կը չքանայ:

Խոհագիր                                                                  

Տուրմով Խմորեղէն

Այսօրուան խոհագիրին պատրաստութիւնը ձեզմէ ընդամէնը կը խլէ 5 վայրկեան. եփի տեւողութիւնն է 10 վայրկեան4 աժան է եւ դիւրին:

Բաղադրութիւն

– 1 ծրար ոլորուած փաթ ֆէօյըթէ խմոր
– Որեւէ տեսակի տուրմ` ըստ ճաշակի
– 1 հաւկիթ
– 50 կրամ հալած կարագ

Պատրաստութիւն

Փուռը նախապէս տաքցնել 180 ջերմաստիճանով:

Խմորը բանալ եւ ձեւաւորել 4 քառանկիւններ` 11×13սմ.:

Վրձինով մը հալած կարագը ծեփել խմորներուն վրայ, ապա իւրաքանչիւրին երկայնքին տուրմ շարել, ոլորել եւ ծայրամասերը լաւ գոցել` հեղուկ կաթով:

Խմորները շարել իրարմէ հեռու` փուռ գացող ափսէի մը մէջ, երեսը ծեփել հաւկիթով եւ եփել տաք փուռին մէջ շուրջ 10 վայրկեան:

Շաբթուան Բանաստեղծութիւնը

Լոյսը

Կ՛երթամ աղբի՜ւրը լոյսին…
Ուղին երկար է, սալարկուած է ուղին
Կայծքարերով, ցանկուած` մուրտի փուշերով.
Ուղին շեղ է ճառագայթի մ՛հանգունակ:
Անկէ կ՛ելլեմ յենլով դողդոջ ծունկերուս,
Եւ ծունկերէս, զոր գամեցին եղբայրներս,
Արիւնըս տաք կը բըղխի:
Հեւքն է` կուրծքիս, թարթիչներուս վրայ` փոշին:
Սիրտըս սափորն է դատարկ,
Ու ես կ՛երթամ դէպի աղբիւրը լոյսին…

Լոյսը մարմարն է երկնային հանքերուն,
Որով Արուեստն, անմահական երազով,
Կը քանդակէ ձիւնամարմին աստուածներ:
Իր ծոցին մէջ կը ծընին
Մռայլ Տանթէներն ու Հոմերները հըսկայ,
Զոր գիշերուան մէջ խորին
Բանաստեղծները կը խըմեն աստղերէն`
Որ նըւագեն ցերեկուան մէջ` Մարդերուն:
Ան ամէնո՜ւն զինքը կու տայ, ամէնո՜ւն
Կը բաժնըւի, եւ կը մընայ անբաժան
Նըշխարքին պէս.- ան նըշխարքն է` որ կ՛իջնէ
Ամէն առտու, սեղաններուն վըրայ մեր,
Մարդեղութեան արիւնլըւայ խորհուրդին:
Ու ես կ՛երթամ դէպի աղբի՜ւրը լոյսին…

 ԴԱՆԻԷԼ ՎԱՐՈՒԺԱՆ

(Հատուած)