Մեր Զաւակները Եւ Մենք. Մանուկները Պատկերասփիւռէն Հեռու Պահեցէք

Պատրաստեց՝ ՇՈՒՇԻԿ ՄԱՒԻՍԱԳԱԼԵԱՆ

Ամերիկեան մանկաբուժական հիմնարկի մէկ տեղեկութեան համաձայն, երկու տարեկան եւ վար մանուկները պատկերասփիւռին առջեւ պէտք չէ նստեցնել:

Տեղեկագրութեան համաձայն, այդ տարիքի մանուկները բան չեն հասկնար իրենց տեսածէն: երկրորդ` անոնք ուշ լեզու կ՛ելլեն: Միւս կողմէ` իրենց մանուկները պաստառին յանձնող ծնողները նուազ առիթ ունին անոնց հետ խօսելու, անոնց բաւարար ժամանակ տրամադրելու:

Տեղեկագրութիւնը կը թելադրէ այս տարիքի մանուկներուն ձեռքը տալ իրենց տարիքի համապատասխան խաղալիքներ, որոնք աւելի օգտակար կրնան ըլլալ անոնց մտային աճումին: Հետեւաբար նախընտրելի է քիչ մըն ալ սպասել` նախքան մանուկները պատկերասփիւռին յանձնելը:

7 Համոզիչ Պատճառներ` Կազաւորուած
Խմիչքներէն Հրաժարելու Համար

– 1 –

«Քոքա-քոլա»-ի թիթեղ մը 35 կ շաքար կը պարունակէ, ինչ որ համազօր է 7 կտոր շաքարի, իսկ 2 լիթրնոց շիշը` 212 կ շաքար, այսինքն… 42,5 կտոր շաքարի:

– 2 –

Կազաւորուած խմիչքներու ֆոսֆորային թթուն կը դանդաղեցնէ մարսողութիւնը եւ կը նպաստէ ոսկորներու հետ կապուած հիւանդութիւններու յայտնութեան, յատկապէս` օսթէօփորոզին:

– 3 –

«Ամերիքըն աքատեմի աֆ ներոլոժի»-ի ուսումնասիրութիւնները եկած են այն եզրակացութեան, որ կազաւորուած խմիչքներու չարաշահումը կրնայ ընկճախտ պատճառել:

– 4 –

Առատ քաֆէին պարունակող կազաւորուած խմիչքները կրնան քաղցկեղի որոշ տեսակներ, անքնութիւն, արեան ճնշում պատճառել:

– 5 –

Լուրջ հետազօտութիւններ կը հաստատեն, որ կազաւորուած խմիչքները սոնքութեան հիմնական պատճառներէն են:

– 6 –

«Ամերիքըն ասոսիէյշըն ֆոր քենսըր ռիսըրչ»-ի ուսումնասիրութիւններուն համաձայն, կազաւորուած խմիչքներու չարաշահումը 87 առ հարիւրով կը բարձրացնէ պանկրէասի քաղցկեղի հաւանականութիւնը:

– 7 –

Մայամի եւ Քոլիւմպիայի համալսարաններու գիտնականներուն համաձայն, տայէթ կազաւորուած խմիչքները 43 առ հարիւրով ենթակայ են ուղեղի կաթուածի եւ սրտանօթային հիւանդութիւններու:

Եթէ Տունը Տակաւին Քանի Մը Շիշ Կազաւորուած Խմիչք Ունիք, Զանոնք Գործածեցէք`

ա.- Հագուստներուն վրայէն ժանգի հետքերը մաքրելու համար,

բ.- Այրած յատակով կաթսաները մաքրելու համար,

գ.- Մազերուն փակած կպչուն բաներ մաքրելու համար,

դ.- Արտաքնոցը մաքրելու համար,

ե.- Մետաղի վրայի (ինքնաշարժ, հեծանիւ եւ այլն…) ժանգի հետքերը մաքրելու համար:

Մեր Առօրեան Դիւրացնող Հնարքներ

– Կափարիչով օժտուած ապակեայ շիշի մը մէջ նարինջի կեղեւ եւ ճերմակ քացախ լեցուցէք. կափարիչը գոցեցէք ու զով տեղ մը առնուազն 2 շաբաթ պահեցէք: Ստացուած հեղուկը ջրմուղ շիշի մէջ լեցուցէք եւ տան մէջ սփռեցէք ապականած օդը մաքրելու, կերակուրի հոտը չէզոքացնելու եւ տան մէջ հաճելի բոյր սփռելու համար:

***

Երբ ձեր հագուստին վրայ մելանի արատ կայ, զայն մաքրեցէք հեղուկ կաթով: Խոշոր բամպակի կտոր մը կաթի մէջ թաթխեցէք եւ ապա մելանի արատին վրայ թեթեւ հարուածներ տալով` ջանացէք մաքրել զայն:

***

Եթէ  սառցարանին մէջ կերպընկալ տոպրակով յօշած միս պիտի պահէք, միսը տոպրակին մէջ զետեղելէ ետք տափակցուցէք, ապա խորովածի շամփուրի օգնութեամբ քառակուսիներ ձեւաւորեցէք: Այսպիսով, կրնաք ամէն անգամ միսէն բաժին մը գործածել` առանց ամբողջութիւնը հալեցնելու:

***

Մարզանքի կօշիկներուն քաուչուկէ պատրաստուած ճերմակ բաժինները մաքրելու լաւագոյն միջոցը ակռայի դեղն է: Զայն հին ակռայի խոզանակի մը միջոցով ամուր շփեցէք քաուչուկի ամբողջ տարածքին, ապա ցօղուեցէք առատ ջուրով եւ չորցուցէք:

Առողջապահական

Տէ Կենսանիւթի Պակասով
Պայմանաւորուած Հիւանդութիւններ

Տէ կենսանիւթը մեր մարմնին համար չափազանց անհրաժեշտ է: Անիկա այնքան անհրաժեշտ է, որ անոր բացակայութիւնը կրնայ զանազան հիւանդութիւններու դուռ բանալ:

Ստորեւ կը ներկայացնենք Տէ կենսանիւթի պակասի հետ կապուած հիւանդութիւններ.

Կրիփ

Տէ կենսանիւթը կը զօրացնէ մարմնին դիմադրականութիւնը, իսկ անոր բացակայութիւնը կրնայ տկարացնել դիմադրականութեան համակարգը եւ նպաստել կրիփի եւ վարակներու զարգացման:

Արեան Բարձր Ճնշումը

Ուսումնասիրութիւններու համաձայն, արեան բարձր ճնշում ունեցող մարդիկ իրենք զիրենք աւելի լաւ կը զգան Տէ կենսանիւթի դաղահատեր օգտագործելէ ետք:

Քաղցկեղ

Տէ կենսանիւթի պակասը կապուած է կրծքագեղձի, շագանակագեղձի, ձուարաններու եւ ստամոքսի քաղցկեղի հետ: Ուսումնասիրութիւններու համաձայն, Տէ կենսանիւթի բաւարար մակարդակ ունեցող մարդիկ աւելի կայուն են այս հիւանդութիւններուն նկատմամբ:

Ասմա

Թէեւ գիտութիւնը ստոյգ չի գիտեր ասմայի յառաջացման պատճառները, սակայն որոշ ուսումնասիրութիւններ ցոյց տուած են, որ շնչառական հիւանդութիւնները կապուած են Տէ կենսանիւթի ցած մակարդակին հետ:

2-րդ Տիպի Շաքարախտ

Տէ կենսանիւթի բաւարար մակարդակը կ՛օգնէ պաշտպանուելու 2-րդ տիպի շաքարախտէ:

Յօդացաւ

Եթէ կը տառապիք մշտական յօդացաւէ, անհապաղ ստուգեցէք Տէ կենսանիւթի մակարդակը:

Բժիշկները կը թելադրեն յաճախ զբօսնել մաքուր օդին, յատկապէս` արեւոտ օրերուն:

Եթէ մտադիր էք Տէ կենսանիւթի դեղահատեր գործածել, անպայման խորհրդակցեցէք ձեր բժիշկին հետ: Տէ կենսանիւթի պակասը արեան քննութեամբ կը պարզուի:

Խոհագիր

Բանջարեղէնով Դդմաճ

Բաղադրիչներ

– 500 կ ֆարֆալէ դդմաճ (թիթեռնիկի ձեւով)
– 4 դգալ շատ մանր մանրուած սխտոր
– 1 սոխ, մանր մանրուած
– 1 սմբուկ` կեղուըւած եւ խորանարդաձեւ կտրտուած
– 3 դդում` խորանարդաձեւ կտրտուած
– 3 կարմիր պղպեղ` խորանարդաձեւ կտրուած
– 1/2 սուրճի գաւաթ ձէթ
– 1/2 սուրճի գաւաթ փեսթօ թացան
– 1/2 սուրճի գաւաթ տաշուած փարմըզան
– 1/2 սուրճի գաւաթ խորոված սնոպար
– Աղ, սեւ պղպեղ

Պատրաստութիւն

Կաթսային մէջ ջուր եռացնել, աղ աւելցնել եւ ֆարֆալէն խաշել եւ քամոցի մէջ փոխադրել:

Տապակին մէջ ձէթը տաքցնել, ապա յաջորդաբար աւելցնել սոխը, սխտորը եւ կտրտուած բանջարեղէնները եւ 10 վայրկեան թեթեւ կրակի վրայ եփել:

Խաշած խմորը աւելցնել բանջարեղէններուն վրայ, նոյնպէս ալ` փեսթօ թացանը եւ պանիրը: Աղել, համեմել ու զգուշութեամբ խառնել:

Փոխադրել ներկայանալի ամանի մը մէջ, երեսը զարդարել սնոպարի հատիկներով ու մատուցել:

Շաբթուան Բանաստեղծութիւնը

 Քո Ձեռքերը

Ես սիրո՜ւմ եմ քո ձեռքերը
Որոնք, արդէն քանի՜ տարի,
Ինձ ամէնի՛ց ամուր գրկում,
Սակայն երբեք չե՛ն… բանտարկում.
Ինձ աշխարհի տէ՛րը անում,
Սակայն երբեք չեն տիրանում.
Օղակի պէս շուրջս պրկւում,
Բայց չե՜ն խեղդում,
Այլ` լոկ փրկո՜ւմ,
Ինչպէս փրկում են խեղդուողի՛ն…
Քո ձեռքե՛րը, –
Նո՜ւրբ,
Ասողի՜կ,
Ու երգեցի՜կ,
Որոնց ափում,
Ես` չո՜ր խեցի,
Մարգարի՜տ եմ քիչ-քիչ դառնում…
Ես սիրում եմ քո ձեռքերը…
«Մարգարի՛տ եմ քիչ-քիչ դառնում…» –
Իսկ Մարգարիտն այս աշխարհում
Ինչքան էլ թա՜նկ լինի, անգի՛ն,
Ինչքան չքնա՜ղ ու եզակի՜, –
Երբեք պիտի չխնայե՜ս
Եւ… միշտ… կրծք՛իդ վրա՛յ պահես, –
Թէ չէ, քո ջե՜րմ կրծքից հեռու,
(Քո սիրո՛ւց ու կրծքից հեռո՛ւ),
Իսկոյն խամրո՜ւմ է, դալկանո՜ւմ, –
Կրկին դարձած… նոյն չոր խեցի՜ն…
Իմ սիրելի՜,
Իմ ասողի՜կ,
Իմ գեղեցի՜կ…

ԳԷՈՐԳ ԷՄԻՆ