Պատրաստեց՝ ՇՈՒՇԻԿ ՄԱՒԻՍԱԳԱԼԵԱՆ
Երեխաներուն համար տան ամէնէն վտանգաւոր վայրերէն մէկը բաղնիքն է: Մինչեւ 6 տարեկան երեխայ մը երկար ատեն բաղնիքը առանձին ձգելու չէ: Անոր կը սպառնան զանազան վտանգներ. ստորեւ` քանի մը զգուշացում:
– Ծորակէն հոսող տաք ջուրը կրնայ այրել երեխային մարմինը: Նախքան անոր լոգարան մտնելը` պէտք է ջուրը բարեխառնել 45-55 ջերմաստիճան:
– Ջուրով լեցուն լոգարանին մէջ երեխան երկար ժամանակ առանձին պէտք չէ ձգել, որեւէ անխոհեմութիւն կրնայ խեղդամահ ընել փոքրիկը:
– Լոգարանին մօտ զետեղուած շամփուէնը, մազի ու մարմնի խնամքի հետ կապուած հեղուկ օճառներն ու սերերը պէտք է հեռու մնան երեխային հասողութենէն: Շիշերուն գրաւիչ տեսքն ու գոյնը կրնան խմելու փորձութեան մղել փոքրիկը:
– Վարսայարդարիչը եւ այլ ելեկտրական սարքեր ելեկտրական հոսանքին միացած վիճակով պէտք է առնուազն մէկ մեթր հեռու ըլլան լոգարանէն` ելեկտրահարութեան վտանգէն զերծ պահելու համար:
– Բաղնիքին լոգարանին յատակը ծածկել յատուկ գորգով, որպէսզի ոտքի վիճակով` երեխան չսահի ու չիյնայ:
– Բաղնիքին դրան վրայէն հանել բանալին եւ այնպէս մը ընել, որ երեխան, կամայ թէ ակամայ, բաղնիքը առանձին չմնայ:
– Բաղնիքի լուացարանին շուրջ չձգել մկրատ, սափրուելու գործիք, մետաղեայ ծամակալներ եւ այլն… այս բոլորը անբաղձալի արկածներու դուռ կը բանան:
Կին Դէմքեր
Նաոմի Քեմպըլի Երիտասարդութեան
Գաղտնիքները
Նշանաւոր մանըքեն Նաոմի Քեմպըլը վերջերս դարձաւ 49 տարեկան: Նորաձեւութեան աշխարհէն ներս Նաոմի եղած է եւ կը մնայ ամենագեղեցիկ ու ցանկալի կիներէն մէկը:
49 տարիքը թեւակոխած մանըքենը 30 տարեկանի տեսք ունի այսօր. ան կը բացայայտէ իր երիտասարդութեան գաղտնիքները:
– Նաոմի իր օրը կը սկսի բաժակ մը կիտրոնով տաք ջուրով:
– Սուրճի փոխարէն` ան կանաչ թէյ կը խմէ:
– Թեթեւ նախաճաշէ մը ետք մանըքենը եոկա կ՛ընէ:
– Նաոմի որոշած է գեղեցկագիտական գործողութիւններ չընել: Փոխարէնը` ան մորթը պրկող վարժութիւններ կ՛ընէ:
– Անոր ձեռքի պայուսակին մէջ միշտ շիշ մը հանքային ջուր կայ: «Ես լաւ ու հաւասարակշռուած ձեւով կ՛ուտեմ, շաքար պարունակող ուտելիքներէն հրաժարած եմ, եւ շատ ջուր կը խմեմ», կ՛ըսէ Նաոմի:
– Վերջապէս, անուանի մանըքենը երեկոյեան ժամը 8:00-էն ետք բան չ՛ուտեր. կը պատահի նաեւ, որ բոլորովին հրաժարի ընթրիքէն:
Մարիոն Քոթիեար
Ֆրանսացի դերասանուհի Մարիոն Քոթիեարը դարձած է «Chanal No 5» օծանելիքի նոր դէմքը: Գովազդային հոլովակը շուտով պիտի հրապարակուի:
Քոթիեարը համաշխարհային ճանաչում ձեռք բերաւ «Լա վի ան ռոզ» ժապաւէնին մէջ Էտիթ Փիաֆի կերպարը մարմնաւորելով: Ան ներկայիս ֆրանսական շարժապատկերի ամենասիրուած ու յայտնի դերասանուհիներէն մէկն է:
Ճարպ Այրող Տնային Գործեր
Գեղեցիկ ու բարեկազմ մարմին ունենալը բոլոր կիներու երազանքն է: Բայց շատերու համար, մարզասրահ երթալը հնարաւոր չէ, կա՛մ ժամանակ չունին, կա՛մ ալ` միջոցը:
Պարզուած է, որ տնային որոշ գործեր կրնան փոխարինել մարզասրահները: Ստորեւ` քանի մը հետաքրքրական նմուշներ:
Պնակները Լուալ
Ճիշդ է, որ պնակ լուացող մեքենաները փրկարար դեր կը խաղան բազմազբաղ տանտիկիններու կեանքին մէջ, սակայն իմացէք, որ 1 ժամ պնակ լուալով` 90 ջերմուժ կը կորսնցնենք:
Բարձր Դարաններու Փոշին Մաքրել
Գրադարանին, հագուստի պահարանին վերին դարանները մաքրելու եւ փոշեզերծելու համար հարկաւոր է անդադար ոտքի մատներուն վրայ բարձրանալ ու կրկին իջնել: Կարելի է նաեւ աթոռակ օգտագործել: Այս շարժումները նման են աստիճան բարձրանալուն: Այսպիսով, թէ՛ սրունքի մկանները կ՛աշխատին եւ թէ` ժամանակի ընթացքին քիլոներ կը սպառին:
Գորգի Մաքրութիւն
Գորգերը փոշեկուլով մաքրելով` մէկ ժամուան ընթացքին կարելի է 190-230 ջերմուժ այրել: Իսկ շարունակելով եւ սալայատակը սրբելով` 500 ջերմուժ այրել:
Տունը Կարգի Բերել
Տունը կոկելը, փոշին մաքրելը կ՛օգնեն, որ մէկ ժամուան ընթացքին միջին հաշուով այրենք 230 ջերմուժ, ինչ որ համազօր է Մաքտոնալտ՛ծէն պզտիկ բաժին մը տապկուած գետնախնձորի:
Արդուկել
Կ՛երեւակայէ՞ք, որ մէկ ժամ արդուկելով` կարելի է 300 ջերմուժ այրել:
* * *
Գիտէ՞ք, Թէ…
– Օրական երկու անգամ` առտու եւ իրիկուն, 30 վայրկեան ձեր շունը պտըտցնելով` 300 ջերմուժ կ՛այրէք: Եթէ շուն չունիք, դրացիի մը կամ ծանօթի մը դիմեցէք. թէ՛ անոր մեծ ծառայութիւն մատուցած կ՛ըլլաք եւ թէ՛ դուք կ՛օգտուիք:
– Օրական 3 անգամ 10-ական վայրկեան պարան ցատկելով` 300 ջերմուժ կ՛այրէք:
– Օրական 80-100 վայրկեան ձեր երեխային հետ բացօթեայ վազվզելով, գնդակ խաղալով` կրնաք 300 ջերմուժ այրել:
– Պատուհան մը իր շրջանակով եւ ապակիով մաքրելու պարագային, 75 ջերմուժ կ՛այրէք, իսկ 4 պատուհանի պարագային` 300 ջերմուժ:
Ձեռքի Ծեփուկ`
Խնձորով
Մեր ձեռքերը մշտական խնամքի կարիքը ունին: Ջուրի եւ քիմիական դեղերու հետ շփուելով` անոնց մորթը կը կարծրանայ, կը չորնայ, կը կարմրի ու կը բորբոքի:
Ահաւասիկ` ձեռքերու խնամքի յատուկ ծեփուկ մը, որ կարելի է տունը պատրաստել եւ շաբաթական դրութեամբ օգտագործել:
Ծեփուկին համար անհրաժեշտ են`
– 1 խնձոր
– 2 ապուրի դգալ շէկ շաքար
– 1 ճաշի դգալ ձէթ
Պատրաստութիւն եւ գործածութիւն`
Խնձորը քերոցէ անցընել, աւելցնել շաքարն ու ձէթը եւ խառնել:
Ստացուած թանձրուկով նրբօրէն մարձել ձեռքերը, 5 վայրկեան սպասել, ապա ցօղուել գաղջ ջուրով:
Վերջաւորութեան ձեռքերը օծել սնուցող սերով մը:
Այլազան
Առանց Դիմատետրի
Համաշխարհային Օր
Վաղը` փետրուար 28-ը, առանց Դիմատետրի համաշխարհային օրն է: Արդեօք կրնա՞ք ամբողջ օր մը հրաժարիլ անկէ…
Օրուան նպատա՞կը. պայքարիլ կախեալութեան դէմ, բողոքել` որպէս տեղեկութիւն անցնող ծանուցումներուն դէմ եւ, վերջապէս, Դիմատետրին յիշեցնել, որ ինք ոչինչ է` առանց իր յաճախորդներուն…
Աշխարհի երեսին 2,13 միլիառ հետեւորդ ունեցող Դիմատետրը շատերու կարծիքով`
«Կ՛արգիլէ տան անդամներուն միջեւ հաղորդակցութիւնը»,
«Կը պակսեցնէ ընտանեկան այցելութիւնները, ինչպէս նաեւ` բարեկամներու յաճախակի հանդիպումները»,
«Դիմատետրի մոլիները տարբեր աշխարհի մէջ կ՛ապրին եւ հրաժարած են մարդկային յարաբերութիւններէն»:
Իսկ խուլ անձի մը կարծիքով, «Առանց Դիմատետրի օր մը անհնարին է ինծի նմաններուն համար, մեռած օր մըն է, քանի որ հաղորդակցելու մեր միակ միջոցն է»:
Կ՛արժէ մտածել…
Այս առիթով նշենք, որ փետրուար ամիսը հարուստ էր տարօրինակ միջազգային օրերով. այսպէս`
Փետրուար 5-ը` «Նիւթելլա»-ի միջազգային օր,
Փետրուար 16-ը` առանց բջիջայինի միջազգային օր,
Փետրուար 21-ը` զբօսավարներու միջազգային օր,
Փետրուար 28-ը` առանց Դիմատետրի միջազգային օր:
Խոհագիր
Մեղրով Պահքի Թխուածք
Բաղադրիչներ
– 2 բաժակ ալիւր
– Կէս բաժակ շաքար
– 3 թէյի դգալ մեղր
– 100 կրամ ընկոյզ
– 0.5 թէյի դգալ սոտա
– 3 ապուրի դգալ բուսական իւղ
– 1.5 բաժակ ջուր
– 50 կրամ շաքարի փոշի (ըստ փափաքի)
Պատրաստութիւն
Փոքր կաթսային մը մէջ լեցնել ջուրը, մեղրն ու շաքարը, լաւ խառնել որպէսզի լուծուին եւ թեթեւ կրակի վրայ 5 վայրկեան եփել, յետոյ ձգել, որ հանգչի:
Խառնուրդին աւելցնել մաղէ անցած սոտան եւ ալիւրը, բուսական ձէթը, մանրուած ընկոյզը եւ խառնել փայտեայ դգալով, մինչեւ որ միատարր խմոր մը ստացուի:
Խմորը լեցնել կաղապարի մէջ եւ նախապէս տաքցուած փուռի մէջ եփել 40 վայրկեան 190 ջերմաստիճանով:
Փուռէն հանելէ ետք սպասել, որ պաղի եւ ըստ փափաքի, կարելի է երեսը փոշի շաքարով զարդարել:
Շաբթուան Բանաստեղծութիւնը
Չէ որ ամէն ինչ քեզ ունենալու համար էր միայն,
Իսկ ես ամէն ինչ ունեցայ կեանքում`
Քեզանից բացի.
Եւ ես ոչնչով միայն մնացի`
Ունեցայ ոչինչ.
Աշխարհում այս մեծ ,
Անսկիզբ, անվերջ,
Անյատակ ու լայն,
Չէ որ ամէն ինչ քեզ ունենալու համար էր միայն…
ՄԱՐՕ ՄԱՐԳԱՐԵԱՆ