Լրագրութեան վարժողական ծրագիրի շրջագիծին մէջ, երէկ երեկոյեան ժամը 5:00-ին տեղի ունեցաւ հանդիպում մը Սալբի Պուլղուրճեան-Սիմիթեանի հետ, «Ազդակ»-ի խմբագրատան մէջ:
Ս. Պուլղուրճեան-Սիմիթեան ապագայ լրագրողներուն ներկայացուց լրագրութեան տարբեր ժանրերը, սկսելով լուրէն, անցնելով լուսանկարներու լրագրութեան, ծաղրանկարներու ժանրին, հասնելով մինչեւ խմբագրականին:
Ան բացատրեց բոլոր պարագաներուն որդեգրուելիք քայլերը, սակայն ամէնէն աւելի կեդրոնացաւ յօդուածագրութեան վրայ:
Ս. Պուլղուրճեան-Սիմիթեան անդրադարձաւ յօդուածին մէջ տրուելիք ճշգրիտ տեղեկութիւններուն, հետաքրքրական կերպով նիւթը ներկայացնելու, ընթերցողին վրայ ձգելիք ազդեցութեան եւ իբրեւ վերջաբան տրամադրուելիք առաջարկներուն ու լուծումներուն կարեւորութեան:
Ապա ան խօսեցաւ լրագրողին պատասխանատուութեան մասին` շեշտելով անհրաժեշտութիւնը մթնոլորտը անկեղծ ու հարազատ կերպով ներկայացնելու:
Ս. Պուլղուրճեան-Սիմիթեան ընդգծեց, որ լրագրողը միշտ պատրաստ պէտք է ըլլայ խմբագիրին հետ խորհրդակցելու եւ պատրաստակամ` իր յօդուածը փոփոխութեան ենթարկելու:
Ան շեշտեց կարդալու կարեւորութիւնը` հաստատելով, որ, թէեւ պէտք է առարկայական ըլլալ, «սակայն բացարձակ առարկայականութիւն չկայ, երբ հոգիէդ կը գրես», դիտել տոաւ Ս. Պուլղուրճեան-Սիմիթեան:
Ապագայ լրագրողները մեծ հետաքրքրութիւն ցուցաբերեցին բացատրուած թեքնիքներուն նկատմամբ: