Գիրք Կարդալու 10 Համոզիչ Պատճառներ

Պատրաստեց՝ ՇՈՒՇԻԿ ՄԱՒԻՍԱԳԱԼԵԱՆ

Շատեր չեն յիշեր, թէ վերջին անգամ ե՛րբ հետաքրքրական վէպ մը կարդացեր են… Դժբախտաբար գիրք կարդալու գեղեցիկ սովորութիւնը օրէ օր կը նահանջէ, մինչ Ինսթակրամն ու Ֆէյսպուքը կը նուաճեն բոլորին սրտերը… Ստորեւ կը ներկայացնենք 10 համոզիչ պատճառներ` գիրք կարդալու.

1 – Ընթերցումը կը բարելաւէ յիշողութիւնը:
2 – Ընթերցումը կը հարստացնէ բառապաշարը:
3 – Ընթերցումը կը զարգացնէ եւ կը բարելաւէ գիտելիքները:
4 – Ընթերցումը կը բարելաւէ շարադրելու ունակութիւնը:
5 – Ընթերցումը կը բարելաւէ ուշադրութիւնն ու կեդրոնացումը:
6 – Ընթերցումը հոգեկան բաւարարութիւն կը պարգեւէ:
7 – Ընթերցումը ձրի հաճոյք է:
8 – Ընթերցումը կը նուազեցնէ ընկճախտը:
9 –  Ընթերցումը կ՛աշխուժացնէ ուղեղը:
10 – Ընթերցումը կը զարգացնէ քննական միտքը:

Յովհաննէս Թումանեան ըսած է. «Պէտք է կարդալ, ամէն մի կարդալը մի բան է տալիս ու աննկատելի կերպով ամբարւում, բան դառնում»: Բանաստեղծը մեծ ուսում չէր ստացած, բայց խոր գիտելիքներ ստացեր էր ինքնակրթութեամբ: Իր կարճատեւ ու դժուար կեանքին ընթացքին ան 10.000 գիրք հաւաքած էր: Մեծ բանաստեղծին 10 հազար գիրքերէն 8150-ը պահպանուած են: 2000 գիրք փոխ առեր են ու չեն վերադարձուցեր:

Ոճաբանին Կարծիքով

10 Խորհուրդ` Կազմուածքով
Լեցուն Կիներուն Համար

Բրիտանացի ձեւագէտ Ալեքսանտր Մըքուին 10 գործնական խորհուրդներ կու տայ կազմուածքով լեցուն կիներուն, որպէսզի անոնք աւելի սլացիք եւ վայելուչ տեսք ունենան:

– 1 –

Ընտրեցէք թեթեւ ու թոյլ կտորներ, որոնք չեն շեշտեր ձեր փորը, կոնքը, կուրծքերը եւ այլն…

– 2 –

Հրաժարեցէ՛ք կոնքէն սկսող ճինզերէն, որոնք աւելի եւս կը շեշտեն փորի հատուածը: Նախապատուութիւնը տուէք բարձր մէջքով տարբերակներուն: Նոյնպէս ա հրաժարեցէք շատ նեղ ու մարմնին ձեւը առնող տաբատներէն եւ նախապատուութիւնը տուէք քուփ սիկարեթ կտրուածքին եւ ոչ` փաթ տ՛էլեֆանին:

– 3 –

Առհասարակ հրաժարեցէ՛ք գծաւոր (յատկապէս` հորիզոնական), ծաղկաւոր եւ ֆոսֆորային գոյներով հագուստներէն: Նախապատուութիւնը տուէք չէզոք, միագոյն տեսակներուն` զանոնք համադրելով գեղեցիկ աքսեսուարներու հետ:

– 4 –

Հրաժարեցէ՛ք փոթով, վոլաններով փէշերէն, որոնք աւելի ծաւալ կու տան եւ կը շեշտեն ձեր կոնքերը:

– 5 –

Խուսափեցէ՛ք բոլորովին անթեւ հագուստներէն` ընտրելով քիչ մը լայն եւ առնուազն մինչեւ արմուկ երկարող տեսակները:

– 6 –

Հրաժարեցէ՛ք մեծ եւ ցցուն գրպաններով օժտուած բաճկոններէն եւ տաբատներէն:

– 7 –

Եթէ մեծ կուրծքեր ունիք, ընտրեցէք կլոր կամ քառակուսի կտրուածքով օձիքները:

– 8 –

Հրաժարեցէ՛ք կարճ մոյկերէն, որոնք կը շեշտեն ձեր հաստ սրունքները: Նաեւ յիշեցէ՛ք, որ մարզական, ինչպէս նաեւ տափակ, անկրունկ կօշիկները կանացի չեն եւ չեն նպաստեր ձեր իգական տեսքին:

– 9 –

Ունեցէ՛ք միագոյն, ուղիղ կտրուածքով բաճկոն եւ զայն կրեցէք առանց կոճկելու: Այս ձեւի բաճկոն մը կը ծածկէ ձեր փոքրիկ թերութիւնները եւ որոշ վայելչութիւն մը կու տայ:

– 10 –

Վերջապէս, խուսափեցէ՛ք փաթ տ՛էլեֆան տաբատներէն եւ պլուզոն կոչուած կարճ բաճկոններէն, որոնք սլացիք երեւալու ձեր բոլոր ճիգերը կը չքացնեն:

Տան Յարդարանք

 Ծառերու Ճիւղերուն Երկրորդ Կեանք Մը Տալ

Եթէ բնութեան մէջ արշաւի կամ պտոյտի ժամանակ գտնէք ծառի հաստ կամ բարակ լքուած ճիւղեր, տեսէք, թէ ինչերո՛ւ կրնաք վերածել զանոնք` ի հարկին դիմելով ճարտար բարեկամի մը օգնութեան.

ա – Լուսամփոփի ոտքի մը,

բ – Պատի լուսաւոր զարդի մը,

գ – Հագուստի, պայուսակի, վզկապի կախիչի մը,

դ – Կախազարդերը դասաւորելու հետաքրքրական կախիչի մը:

Ինչպէս նկարները կը հաստատեն, ճիւղերը օգտագործուած են իրենց բնական վիճակով, ինչ որ աւելի ոճային եւ գեղեցիկ կը դարձնեն զանոնք:

Խոհագիր

Ոսպով Ապուր`
Լոլիկով Եւ Ստեպղինով

 Բաղադրիչներ

– 4,5 գաւաթ մսաջուր
– 3 ստեպղին` կլոր կտրատուած
– 1 մանրուած սոխ
– 2/3 գաւաթ սեւ ոսպ` խաշած եւ քամոցէ անցած
– 2 գաւաթ կեղւըուած եւ խիւսի վերածուած լոլիկ
– 2 ապուրի դգալ մանրուած ազատքեղ
– 1,5 թէյի դգալ փոշի սխտոր (կարելի է թարմը գործածել)
– Աղ, սեւ փոշի պղպեղ

Պատրաստութիւն

Մսաջուրը կաթսային մէջ լեցնել եւ թեթեւ կրակի վրայ աւելցնել ոսպը, սոխն ու ստեպղինը: Երբ եռալու սկսի, կրակը թեթեւցնել, կաթսան կափարիչով փակել ու եփել շուրջ 25 վայրկեան, մինչեւ որ բաղադրիչները փափկանան:

Աւելցնել` լոլիկը, սխտորը, ազատքեղը, աղն ու սեւ պղպեղը, խառնել եւ 10 վայրկեան եւս եփել:

Ապուրը մատուցել տաք, երեսը զարդարել մանրուած ազատքեղով եւ լոլիկի շերտերով: Կարելի է օգտագործել նաեւ չոր լոլիկի շերտեր:

Ոսպ Ուտելու Համոզիչ Պատճառներ

– Ոսպը հարուստ է բուսական փրոթէինով:
– Ոսպը հարուստ է երկաթով:
– Ոսպը օգտակար է մարսողական դրութեան:
– Ոսպը օգտակար է սրտին:
– Ոսպը կը նուազեցնէ գէշ քոլեսթերոլը:
– Ոսպը կը պաշտպանէ կարգ մը հիւանդութիւններէ, յատկապէս` փրոսթաթի քաղցկեղէ:
– Ոսպը քիչ ջերմուժ կը պարունակէ, հետեւաբար կ՛օգնէ նիհարնալու:

Շաբթուան Բանաստեղծութիւնը

Ձի՛ւն, Մի՛ Իջիր

Ձի՛ւն, մի՛ իջիր իմ վարսերին,
Ա՜խ, ես այնքան ջահել եմ դեռ,
Մինչեւ հիմա կեանքի վերից
Երազներով սահել եմ դեռ:
Երէկ էր լոկ, որ ես ճերմակ
Զոյգ ժապաւէն էի կապում.
Իսկ դու այսօր պաղ ու ճերմակ
Սառոյցներ ես դէմս կապում:
Եւ ինչո՞ւ ես դու շտապում,
Փաթիլներըդ վրաս թափում,
Մի տես որքան կայծ ու կրակ,
Կանաչ, կարմիր երազանքներ,
Մի տես որքան կարօտ ու սէր,
Հոգուս խորքում պահել եմ դեռ:

ՄԱՐՕ ՄԱՐԳԱՐԵԱՆ