Պատրաստեց՝ ՇՈՒՇԻԿ ՄԱՒԻՍԱԳԱԼԵԱՆ
Ճատրակը հիանալի խաղ է` երեխաներուն սորվեցնելու համար: Տասնեակ հետազօտութիւններ ցոյց տուած են, որ փոքր տարիքէն ճատրակ խաղացող երեխաները, թէ՛ դպրոցը, եւ թէ կեանքի մէջ աւելի յաջողակ կ՛ըլլան, քան մնացեալները:
Ուսումնասիրութիւններ ցոյց տուած են, թէ այն ուսանողները, որոնք ճատրակ կը խաղան, աւելի լաւ արդիւնքներ ձեռք կը բերեն գիտութեան, ուսողութեան մէջ, անոնք նաեւ կ՛ըլլան աւելի վերլուծող, կարգապահ եւ համբերատար:
Ահա 9 համոզիչ պատճառներ` փոքր տարիքէն ձեր երեխային խաղալ սորվեցնելու:
1.- Ճատրակը կ՛օգնէ խնդիրներ լուծելու: Ճատրակը խնդիրներու ամբողջ շարք մըն է. անիկա երեխաները կը մղէ վերլուծելու իւրաքանչիւր խնդիր եւ աշխատելու անոր լուծման ուղղութեամբ:
2.- Ճատրակը կը սորվեցնէ կեդրոնացում եւ համբերութիւն:
3.- Ճատրակը կ՛օգնէ յաջողակ աշակերտ դառնալու:
4.- Ճատրակը կը զարգացնէ երեխային ինքնավստահութիւնը:
5.- Ճատրակը կ՛օգնէ երեխային ուղեղի աճին եւ զարգացման:
6.- Ճատրակը կը բարձրացնէ երեխային ստեղծագործական ունակութիւնները:
7.- Ճատրակը կը սորվեցնէ ծրագրաւորում եւ հեռատեսութիւն:
8.- Ճատրակը կը բարելաւէ երեխային յիշողութիւնը:
9.- Ճատրակը կը հաւասարակշռէ երեխային յուզական աշխարհը:
Նորաձեւութեան Աշխարհէն
Աւելի Նիհար Եւ Սլացիկ Տեսք
Ունենալու 5 Հնարքներ
Նախկին «մանըքէն» եւ ներկայիս` նորաձեւութեան խորհրդատու Քրիսթինա Քորտիւլա մեզի կը ներկայացնէ աւելի նիհար եւ սլացիկ տեսք ունենալու 5 օգտակար հնարքներ, որոնցմէ մի քանիին վստահաբար ծանօթ էք:
1.- Բարձր Մէջքով Տաբատներ Կրեցէք
Այո՛, բարձր մէջքով տաբատը կ՛երկարէ ձեր մարմնին վարի բաժինը եւ աւելի սլացիկ տեսք կու տայ. անիկա նաեւ կ՛ամփոփէ ձեր կոնքն ու փորը եւ կը ծածկէ որոշ թերութիւններ:
2.- Ուշադիր Եղէք Նախշերուն Եւ Գոյներուն
Խուսափեցէք մէկէ աւելի վառ գոյներ կրելէ: Նոյնպէս ալ կարելի եղածին չափ չափաւորեցէք փոթերով, «փայէթ»-ներով, ցցուն ձեռագործներով վերնաշապիկները` ի հարկին զանոնք համադրելով միագոյն, մութ գոյնի տաբատներու կամ փէշերու հետ:
3.- Ճիշդ Կօշիկ Ընտրեցէք
Սլացիկ տեսք ունենալու պայմաններէն մէկն ալ ճիշդ կօշիկի ընտրութիւնն է: Մի՛ վարանիք բարձրակրունկ կամ միջին բարձրութեամբ կօշիկներ կրելէ: Որքան ձեր կօշիկը «սանտալ»-ի տեսք ունենայ եւ որքան մորթի գոյնին մօտ ըլլայ, այնքան սլացիկ տեսք կ՛ապահովէք: «Պալըրին»-ները, թանձր ներբանով կոպիտ մոյկերը աւեր կը գործեն. կը տուժէ թէ՛ ձեր քալուածքը, եւ թէ իգականութիւնը:
4.- Միջին Չափի Պայուսակ Ընտրեցէք
Շատ փոքր պայուսակը կրնայ շեղել ձեր լեցուն կազմուածքը, նոյնպէս ալ խոշոր չափի պայուսակը կրնայ որոշ անհամաչափութիւն ստեղծել: Ահա թէ ինչու լաւագոյնը միջակ չափի պայուսակն է, ինչու չէ իւրայատուկ գոյնով կամ ոճով, որպէսզի ուշադրութիւնը ձեր պայուսակին եւ ոչ թէ ձեր կազմուածքին կեդրոնանայ:
5.- Կտորի Եւ Հիւսուածքի Ճիշդ Ընտրութիւն Կատարեցէք
Հրաժարեցէք թանձր հիւսուածքով հագուստներէն: Յատկապէս թաւիշն ու «թուիտ»-ը կը գիրցնեն եւ կը շեշտեն որոշ թերութիւններ: Նախապատուութիւնը տուէք «ժըրսէ»-ին, մետաքին, բամպակին, որոնք ձեր մարմնին ձեւը կ՛առնեն` նիհար ու սլացիկ տեսք տալով անոր:
Ձեռային Աշխատանք
Գունաւոր Մատիտներուն
Երկրորդ Կեանք Մը Տանք
Դպրոցական զաւակներ ունեցողները վստահաբար ձեռքի տակ ունին մաշած, պզտիկցած գունաւոր մատիտներու կտորներ: Գրչատուփին, պայուսակին կամ դարակին մէջ թափառող մոռցուած մատիտի այդ կտորները վստահաբար օրին մէկը աղբաման պիտի երթան:
Եկէ՛ք չթափենք մատիտի այդ կտորները եւ ճարտար բարեկամի մը օգնութեամբ զանոնք վերածենք գեղեցիկ զարդերու, ինչպէս` ականջօղեր, բանալեկալներ կամ ծամակալներ:
Խոհանոցի Գաղտնիքներէն
Ո՞րն Է Միսը Սառցարանը
Պահելու Ճիշդ Ժամկէտը
Շատ մը տնտեսուհիներ, յատկապէս դուրսը աշխատողները կը նախընտրեն սառցարանը միս եւ բանջարեղէն պահել անհրաժեշտութեան պարագային տարբեր տեսակի ուտեստներ պատրաստելու համար: Սակայն անհրաժեշտ է իմանալ, որ միսի իւրաքանչիւր տեսակ ունի սառեցման յատուկ ժամկէտ, զոր թելադրելի է չշրջանցել:
Մասնագէտներու կարծիքով, սառեցման ժամանակը կը տարբերի ըստ միսի տեսակին: Կարմիր միսը աւելի կարճ ժամանակով կը պահուի, քան թռչնամիսը:
Գիտնականները եզրակացուցած են, որ յօշուած միսը սառցարանը կարելի է պահել մինչեւ 3 ամիս, երշիկները` առաւելագոյնը 3 ամիս, մինչդեռ հորթի, կովու միսը, ինչպէս` ֆիլէն կարելի է պահել 6-էն 7 ամիս:
Ինչ կը վերաբերի հաւի միսին, կարելի է զայն սառցարանը պահել 6-էն 9 ամիս:
Մասնագէտները խորհուրդ կու տան կարելի եղածին չափ կրճատել միսի սառեցման ժամկէտը, որովհետեւ անոր երկարաձգումը կրնայ պատճառ դառնալ, որ ան կորսնցնէ իր սննդային արժէքը:
Միսը սառեցնելու լաւագոյն ձեւը նախ զայն գնման ծրարէն հանելն ու սննդամթերքի պահպանման համար նախատեսուած կերպընկալ տոպրակի մէջ դնելն է: Կարեւոր է նաեւ միսին վրայի ճարպը հանել, քանի որ երկար ժամանակի վրայ կրնայ տհաճ համ տալ:
Խոհագիր
Ստեպղինով Ապուր
Բաղադրիչներ
– 1 քիլօ ստեպղին
– 1 սոխ
– 2 խորանարդ խտացած մսաջուր
– 4 ճիւղ թարմ գինձ
– 1 լիթր ջուր
– Աղ, սեւ փոշի համեմ, քիմիոն
Պատրաստութիւն
Ստեպղինները լուալ եւ կլոր կտրատել:
Սոխը մանրել:
Կաթսային մէջ փոխադրել ստեպղիններն ու սոխը, աւելցնել ջուրը, խտացուած մսաջուրը եւ եփել շուրջ 30 վայրկեան:
Ելեկտրական գործիքով ապուրը թանձրուկի վերածել, համեմել աղով քիմիոնով եւ սեւ պղպեղով: Մատուցման ժամանակ ապուրին երեսը զարդարել մանրուած թարմ գինձով:
Ստեպղին Ուտելու
6 Համոզիչ Պատճառներ
1.- «Պէթա քարոթէն»-ով հարուստ ստեպղինը կը դանդաղեցնէ ծերութեան հոլովոյթը, կը բարելաւէ մորթին վիճակը եւ կ՛արագացնէ վէրքերուն սպիացումը:
2.- Կենսանիւթերով եւ «անթի-օքսիտան»-ներով հարուստ ստեպղինը կը պակսեցնէ գէշ քոլեսթերոլը, կը պաշտպանէ թոքերն ու սիրտը սրտանօթային հիւանդութիւններէ եւ քաղցկեղի որոշ տեսակներէ:
3.- Կենսանիւթերով հարուստ եւ քիչ ջերմուժ պարունակող ստեպղինը յարմար ուտելիք է բոլոր անոնց, որոնք նիհարնալու սննդականոնի կը հետեւին: Հում թէ եփած` զայն կարելի է օգտագործել աղցաններու, ապուրներու եւ նոյնիսկ կարկանդակներու պատրաստութեան մէջ:
4.- Ա. կենսանիւթով հարուստ ստեպղինը կը պաշտպանէ տեսողութիւնը եւ կը նուազեցնէ «քաթարաքթ»-ի եւ տարիքի հետ կապուած աչքի հիւանդութիւններու հաւանականութիւնը:
5.- Փոթասիոմով հարուստ ստեպղինը բնական միզեցնող է, այս պատճառով ալ անիկա իտէալական ուտելիք է երիկամներուն եւ լեարդին առողջութեան համար:
6.- Սէ. կենսանիւթով հարուստ ստեպղինը կ՛աշխուժացնէ մարմնին դիմադրականութիւնը, մանրէասպան է, նաեւ կ՛օգնէ արագ ապաքինման:
****
Շաբթուան Բանաստեղծութիւնը
Ռումբեր Են Կախուել Աշխարհի Գլխին,
Նստած Է Աշխարհն Ռումբերի Վրայ…
Աշխարհը Մօր Պէս Դողում Է Կրկին
Իր Ձեռով Ցանած Հունդերի Վրայ:
Հոգուս Մէջ Առել Տագնապն Աշխարհի
Ու Միտք Եմ Անում Իմ Դերի Վրայ.
Ամենաահեղ Ռումբը Դառնայի,
Պայթէի Բոլոր Ռումբերի Վրայ:
ՀԱՄՕ ՍԱՀԵԱՆ