Բնական Միջոցներ` Բերնին Անախորժ Հոտը Չքացնելու Համար

Պատրաստեց՝ ՇՈՒՇԻԿ ՄԱՒԻՍԱԳԱԼԵԱՆ

Գէշ հոտող բերնին պատճառները այլազան են` փտած ակռաներ, հիւանդ լինտեր, մարսողական հարցեր, եւ այլն… Բերնին մէջ կան միլիոնաւոր մանրէներ, որոնցմէ պէտք է ձերբազատիլ մաքուր շունչ ունենալու համար:

Ահաւասիկ քանի մը բնական միջոց` բերնին վատ հոտերը չէզոքացնելու համար:

1

Ակռաները խոզանակել

Բերնին մանրէները չէզոքացնելու համար անհրաժեշտ է ակռաները խոզանակել ճաշի ժումերէն ետք: Ակռաներուն միջեւ մնացած ուտելիքի մնացորդները գէշ հոտերու պատճառ կը դառնան:

2

Լեզուն մաքրել

Որքան ալ տարօրինակ թուի, այո՛, լեզուն պէտք է օրական մաքրել դեղարանները վաճառուող փոքրիկ իրով մը` դարձեալ զայն մանրէներէն ձերբազատելու եւ գէշ հոտերը չէզոքացնելու համար:

3

Ջուր խմել

Անհրաժեշտ է օրական առնուազն 1,5 լիթր ջուր խմել, արդարեւ, յաճախ բերնի գէշ հոտը հետեւանք է ջուրի պակասի:

4

Բերանը ցօղուել

Օրական քանի մը անգամ ձեր բերանը ցօղուեցէք պիքարպոնաթ տը սուտով կամ մեխակի գամերով պատրաստուած հեղուկներով:

5

Կիտրոն ուտել

Ազդու միջոց մըն է նաեւ կիտրոնը: Եթէ ձեր շունչը գէշ կը հոտի կեղուըուած կիտրոն կերէք կամ անոր հիւթը խմեցէք:

6

Ազատքեղ ծամել

Իւրաքանչիւր ճաշի ժումէ ետք թարմ ազատքեղ ծամեցէք ձեր շունչը թարմացնելու եւ բերնին գէշ հոտը չքացնելու համար:

7

Մեխակի գամ ծամել

Այո՛, առէք մեխակի գամ մը եւ ակռաներով ծամծմեցէք` մաքուր շունչ ապահովելու համար:

8

Կասիայի փայտիկ ծամել

Բերնին անախորժ հոտերը չքացնելու համար նոյնքան ազդու է նաեւ կասիայի փայտիկ մը ծամելը. փորձեցէ՛ք:

9

Անանուխ ծամել

Թարմ անանուխի քանի մը տերեւ ծամեցէք եւ անմիջապէս կը վերագտնէք ձեր թարմ շունչը:

10

Սուրճի հատիկներ ծամել

Չաղացուած սուրճի հատիկներ ծամեցէք, եւ ձեր բերնէն անմիջապէս կը չքանան գէշ հոտերը:

Մեր Առօրեան Դիւրացնող Հնարքներ

ՄԱՆՐ ԻՐԵՐ ԴԱՍԱՒՈՐԵԼՈՒ ՀԱՄԱՐ
Գրպաններով օժտուած եւ պատէն կախուող այս «կարպետը» կ՛օգնէ մեզի, որպէսզի մանր իրեր մէջտեղները «չթափառին» եւ իրենց չափին համաձայն տեղաւորուին այս կամ այն գրպանին մէջ:
Այս կարպետը կարելի է իրագործել կտորներու մնացորդներով: Թէ՛ չափը, թէ՛ գոյներու ընտրութիւնը, եւ թէ գրպաններու ձեւը կախեալ են ձեզմէ:

ԲԱԶԿԱԹՈՌԻՆ ԹԵՒԻՆ ՀԱՍՏԱՏՈՒՈՂ…
Տան մէջ բոլորս ալ ունինք մեզի սիրելի անկիւն մը, ուր կը նստինք կարդալու, պատկերասփիւռ դիտելու կամ ասեղնագործելու: Ահաւասիկ բազկաթոռին թեւին վրայ տեղաւորուող, գրպաններով օժտուած ծածկոց մը` դասաւորելու համար մեր գիրքը, հիւսքի ճաղերը, պատկերասփիւռին հեռավարը կամ այլ իրեր:
Նկարը բաւարար խօսուն է այս ծրագիրը իրագործելու համար:

ԱՂՏՈՏ ԼԱԹԵՐՈՒՆ ՀԱՄԱՐ…
Ահաւասիկ հնարամիտ գաղափար մը` աղտոտ լաթերը տեղաւորելու համար: Առէք խոշոր չափի պլուզ մը, անոր վարի մասը միացնելով կարեցէք, ապա զայն անցուցէք կախիչի մը վրայ եւ ահա՛ պատրաստ է գործածութեան:
Կրնաք ընտրել ննջասենեակին կահոյքին համապատասխանող մանկական նախշերով պլուզ մը, նոյն ձեւով պատրաստել եւ ձեր զաւկին մահճակալին պատէն կախել, որպէսզի գիշերանոցը մէջը զետեղէ:

ԵԼԵԿՏՐԱԹԵԼԵՐԸ ԱՄՓՈՓԵԼՈՒ ՀԱՄԱՐ
Որպէսզի ելեկտրաթելերը մէջտեղները չթափառին, կրնաք զանոնք շատ կոկիկ ձեւով ամփոփել: Առէք բաղնիքի թուղթի խաւաքարտէ քլանը, վրան ճաշակաւոր կպչուն կողք մը անցուցէք, ապա մէջը տեղաւորեցէ

Նորաձեւութիւն

Շանէլի Աշուն-Ձմեռ Հաւաքածոն

Շանէլ նորաձեւութեան տան ձեւագէտ Քարլ Լակըրֆէլտ վերջերս Փարիզի մէջ ցուցադրեց յառաջիկայ աշուն-ձմեռ եղանակներու իր հաւաքածոն` Գրիմ եղբայրներու «Սպիտակաձիւնիկը» թեմայով:

Կաթնասպիտակ սրահին կեդրոնը զետեղուած էր ձուաձեւ խոշոր հայելի մը, իսկ տողանցող մանըքէններուն մեծամասնութիւնը կը կրէր սպիտակ հագուստներ:

Հագուստ-զանգակներ… Լակըրֆէլտ կանացի հագուստները ներկայացուցած էր բոլոր հնարաւոր մեկնաբանութիւններով, հասակներով եւ կտրուածքներով:

Բացի ճերմակէն, յատկանշական էր նաեւ պորտօ գոյնի տիրական ներկայութիւնը: Բիւրեղներ, փետուրներ եւ ասեղնագործեր կը զարդարէին Լակըրֆէլտի ստեղծագործութիւնները, որոնք հմայեցին հանդիսատեսները:

Լակըրֆէլտ չէր մոռցած նաեւ Շանէլ տան խորհրդանիշ դարձած թուիտ թայէօրները, որոնք անժամանցելի գլուխ գործոցներ են շատ շատերու համար:

Ինչպէս սովորութիւն է, փառատօնի աւարտին Քարլ Լակըրֆէլտ ներկայացուց հարսանեկան հագուստը` «յղի հարս»-ի կերպարով:

Խոհագիր

Ամառնային Պաղ Ապուր` Վարունգով

Բաղադրութիւն

- 1 քիլօ մածուն
- 2 կիտրոն
- 2 վարունգ
- 1 պճեղ սխտոր
- Թարմ անանուխի ճիւղ մը
- 2 ապուրի դգալ ձիթաիւղ
- Աղ, սեւ համեմ

Պատրաստութիւն

Վարունգը լուալ, ապա քերոցէ անցընել: Անանուխի տերեւները լուալ, մանրել եւ աւելցնել վարունգին վրայ:

Կէս կիտրոնի հիւթը աւելցնել վարունգին վրայ, նոյնպէս` ձիթաիւղը, ճզմուած սխտորը, աղն ու պղպեղը:

Մածունը լեցնել խորունկ ամանի մը մէջ եւ պատառաքաղով «զարնել» միատարր դարձնելու համար, ապա աւելցնել վարունգին վրայ:

Խառնուրդը սառնարանը պահել առնուազն 3 ժամ: Հրամցնել ներկայանալի բաժակներու մէջ եւ զարդարել վարունգով կամ անանուխի տերեւներով:

Շաբթուան Բանաստեղծութիւնը

Արցունքները

Արցունքներ կան շիթ շիթ տրտում մելամաղձոտ,
Որոնք կու լան թափթըփելով այտին վրայ,
Ամէն կաթիլ հեծկլտուք մը, կոծ մ՛է թախծոտ,
Իր ցօղին մէջ տառապանք մը կը թրթռայ:

Արցունքներ կան պայծառ ու ջինջ եւ անխռով,
Որ արեւու նըշոյլներով կը փողփողեն,
Ծիրանածին անձրեւի պէս հանդարտ ու զով
Երբ որ տեղան, որը բոյր մը կ՛առնէ հողէն:

Լուռ, անշըշուկ խորհրդաւոր արցունքներ կան,
Որ կը բերեն հոգւոյս խորէն սիրոյ կարօտ,
Անոնք ցաւեր մեզ կը պատմեն երկայն երկայն,
Թաղուած սէրեր, զոր կնքած է սուգին նարօտ:

Արցունքներ կան, որոնք քրքիջ ինձ կը թըւին,
Միշտ գոռացող ամպին նըման փոթորկայոյզ,
Որ փայլակներ թօթափելով ծովին, հովին
Մշուշի պէս կը փարատին կեդրոնախոյս:

Արցունք մ՛ալ կայ, որ միշտ կ՛այրէ բայց չի կաթիր,
Հեղուկ բոց մը, բուռն ըսպառիչ, ահեղ կըրակ,
Ցամքած արցունք, որ չի հատնիր մինչեւ մոխիր
Դառնան աչքերն, ըլլայ հոգին կոյտ մ՛աւերակ:

Ո՛վ արցունքներ, ամէնքնիդ ալ ես կը ճանչնամ,
Թէեւ դժբախտ իմ օրերուս, յուշերն ըլլաք,
Ջերմ յուզումով ըզձեզ կ՛օրհնեմ ես յարաժամ,
Ձեզմով կը զգամ սրտիս ապրիլն ես շարունակ:

ՍԻՊԻԼ